Brit Inga/Rihtta Inga Hætta lea guođđán min 25. beaivvi suoidnemánus. Son lei dán jagi deavdán 67 jagi. Mii muitit su buorredáhtolaš, čeahpes ja barggánis olmmožin. Son álggii ge nuorran dienasbargui, ja lávii buriid ságaid muitalit áiggi telefovnnaiguin Televearkkas. Son maiddái nuorran náitalii, muhto dat loahpahuvvui. Daid áiggiid son čađahii oahpaheaddjeoahpu, ja lei moanaid jagiid buorre oahpaheaddji. Son lei guovddáš áššedovdi sámi oahpaheamis. Oahppodirektoráhtta mieđuštii ge su maŋemus rápmisániiguin ja dearvvuođaiguin.
Muhtun munno maŋemus ságastallamis son muitalii ahte go son álggii ohcaladdat barggu maŋŋel ovtta jagi sámi duodje- ja fidnoskuvllas, su eadni finadii ránnádálus Margrethe Oskal ságain ja bođii dieđuin ruoktot ahte son sáhtii oažžut barggu Televearkkas. No de son de beasai buori bargui.
Go sudno Arnfinnain náitosdilli lei loahpahuvvon, son de álggii alit oahpu ohcat ja nu čađahii oahpaheaddji oahpu. Son beasai doaimmahit oahpaheaddjin sihke vuođđu- ja joatkkaskuvllain. Altas son lei moaddelogi jagi, son lea ožžon rámi buori barggu ovddas sihke bargoaddiin, bargoskihpáriin ja oahppiin sihke doppe ja ruovttobáikkis gos ollii barggat muhtun jagi maŋŋil go lei fárren Álttás.
Rihtta Inga lei Máhte Lemet Inggá ja Biret Issáha áidnanieida. Sus lei stuora ja unna vieljaš. Sis lei dállodoallu badjegeahčin Guovdageainnus ja nu lei Rihtta Inga márkanmánná ja -nuorra dan áigodaga go su ruovttugiella, sámegiella, hástaluvvui earenoamážit márkanis. Dán áigodaga muhtumat márkanmánáin hupmagohte ge dárogiela, muhto dan ii dahkan Rihtta Inga. Son lei skuvlačeahppi ja lei dárrolaš juo skuvlaagis. Su unnavieljaš Issát lea riegádan skábman Hámmerfeasttas. Mun muittán go bessen leat fárus márkanis viežžat Rihtta Ingga Siebii. Son lei doppe muoŧás luhtte dan botta go eadni lei oažžume ja viežžame unnavieljaža. Dalle lei juo siivu heasttain vánddardit dálvemáđija jávrriid mielde.
Dát mánát báhce árrat oarbbisin go Rihtta Ingá ii lean eanet go golbmanuppelotjahkásaš go su áhčči jámii muorramáhccái. Biret Issát lei árjjalaš bargguin ja lei nuorran leamaš beakkán boazobargguin. Dállodilis ledje sus buorit hearggit Máhtte-vielljas geahčus sudno Mikkel Loigjiin siiddas Fieddaris, ja mun ge bessen muhtun čáppa luosttat gottasnulppu dápmat vuojániin. Son lei ge muorragurpmiid gárrame go vádjolii. Lean easka gullan ahte Rihtta Inga livččii háliidan ja lei viggan áhčis hearggeráiddu mielde muorrameahccái. Almma hal son lea mánnán juo leamaš sábmái ja mii su de lea movttiidahttán sámi oahpu ja giela ovddidit.
Rihtta Inga lea lohkan rádius girjji Duottarráfis soahtešilljui, maid su čeahci Anders Eira lea čállán Biret Issáha birra soađis 1940, gos son lei báhččin raddošis Áhkánjárggas (Narvik-rattuš 1940).
Mii leat báhcán giitevašvuođain go Rihtta Inga lea geavahan návccaidis doaimmahit ja ovddidit min dilálašvuođa oahpu ja giela dáfus.
Ráfi lehkos su muitui.
