Njukčamánus lágiduvvo vuosttaš konferánsa mas árktalaš guovllu eamiálbmogiid biepmut leat guovddážis, ja ministtar boahtá rahpat kongreassa.
Biebmokongreassa fáddá lea Árktalaš eamiálbmogiid biebmovuogádagat, eamiálbmogiid árbediehtu ja innovašuvdna: biebmodorvvolašvuohta, dearvvašvuohta ja eamiálbmogiid sajádaga nannen árvogeavllis. Dán dieđiha ICR preassadieđáhusas.
Ministtar boahtá
Váldolágideaddjit leat ilus go sáhttet almmuhit ahte Norgga guovlluministtar Linda Hofstad Helleland, Sámi ja minoritehta ossodaga stáhtačálli Anne Karin Olli ja Gourmand International vuođđudeaddji ja njunuš Edouard Cointreau bohtet biebmokongressii lassin ollu earáide.
Kongreassa váldokoordináhtor ja Máilmmi Boazoálbmogiid Searvvi váldočálli, Anders Oskal lea movttet go galget lágidit kongreassa, mii lea boađi boađi.
– Dát doalut leat Árktalaš guovllu eamiálbmogiid biebmokultuvrraid ávvudeamit ja mis bohtetge leat oassálastit miehtá Árktalaš guovllu. Mii sávvat buohkaide bures boahtin, erenoamážit nuoraide, lohka Oskal preassadieđáhusas maid ICR lea almmuhan.
Čájehit biebmoriggodaga
Prográmma sisttisdoallá earret eará mo rádjat ja ráhkadit árbevirolaš ja ođđaáigásaš biepmuid.
Olles vahkku bohtet leat ieš guđetlágan doaimmat, maid ulbmil lea čájehit Árktalaš eamiálbmogiid erenoamáš ja máŋggabealat biebmoriggodagaid, árbevieruid, muitalusaid ja biebmofáluid.
Vuosttas Árktalaš eamiálbmogiid biebmokongreassa lágiduvvo Guovdageainnus njukčamánu 9.b.- 13.b. 2020.
Kongreassa váldolágideaddjit leat Máilmmi Boazoálbmogiid Searvi (WRH), Riikkaidgaskasaš Boazodoalloguovddáš (ICR), UArctic EALÁT Instituhtta ICR:s (UEI), Árktalaš ráđi EALLU prošeakta, ja NDR Rievdan prošeavtta bargopáhkka 3.
