Sámi dáiddaguovddáš Kárášjogas čájeha Mihku Biehtára /Petteri Laiti dáiddadujiid beannot mánu.
Sámi dáiddaguovddáš (SDG) čájeha Mihku Biehtára / Petteri Laiti dáiddadujiid beannot mánu, golggotmánu vuosttaš beaivvis gitta skábmamánu 15 .beaivái. Čájáhus lea SDG ja RDM sámi dáiddamagasiinna ovttasbargu gos eanaš dáiddaduojit leat vižžon, earret dáiddára iežas dujiid, čállá SDG.
– Mu dáiddaduojit leat vuolgán árbevirolaš dujiin, muhto leat hábmejuvvon dán áiggi dárbbu mielde, čilge dáiddaduojár Mihku Biehtár ieš.
Mihku Biehtár lea eret Ohcejoga gielddas, muhto ássá dál Anáris Suoma bealde.
Su dáidagis vuohttá sihke árbevieru, ávnnasmáhtu ja dáiddalaš dáiddu. Son lohká jus galgá áddet sámi duoji áidnalunddotvuođa, de ferte duojára vuolggasadji vuolgit seamma báikkis. Buoremus ávdnasat su mielas leat čoarvi, duollji, silba, golli ja báhkki. Son lea oahppan árbevirolaš duoji ruovttus ja gazzan oahpu Sámi álbmotallaskuvllas Johkamohkis, Lahti oahpaheaddjiskuvllas, Lahti gollerávdiskuvllas. Son ásahii 1995:s Samekki fitnodaga Anáris. Su dáiddaladuojit leat čájehuvvon Suomas, Davviriikkain, Hollánddas, Fearasullos, Itálias, Espánnjas, Kanadas, USA:s, Japánas ja Ruoššas.
Son lea ožžon olu bálkkašumiid ja 2019 giđa gudnejahttui son gudnedoavttirin Lappland universitehtas Roavvenjárggas.
