Ovttajienalaš fylkkalávdegoddi lea mearridan ásahit fágaskuvlla Finnmárkui.
Finnmárkku fágaskuvla álggahuvvo ođđajagimánu 1. beaivve 2024 ja dan kánturbáiki lea Girkonjárggas Mátta-Várjjaga gielddas. Fylkkalávdegotti earenoamáš čoahkkimis gaskavahku juovlamánu 20. beaivvi válljejuvvui maid stivra skuvlii.
Ii šat ovttasbargu
Go Romssa fylkkagielda ja Finnmárkku fylkkagielda ledje ovttastahttojuvvon, de ásahuvvui Fágaskuvla Davvin. Maŋŋá go Romsa ja Finnmárku galge earránit, de háliidii Finnmárku joatkit ovttasbarggu Davvi Fágaskuvllain. Dán mearridii Finnmárkku fylkkadiggi – mii lei vuosttaš mii mearridii fágaskuvlaovttasbarggu. Maŋŋelis seamma vahkus lei fylkkadikkis čoahkkin Romssas, gos mearriduvvui ahte ovttasbargu Finnmárkkuin heaittihuvvo.
Finnmárkku fylkkasátnejođiheaddji, Hans-Jacob Bønå (O), dajai dalle ahte son lea hirpmástuvvan Romssa fylkkagieldda mearrádusain.
