Deanučázádaga Luossabreavaeaiggádat (DLB) ja Deanučázádaga Luossabivdosearvi (DBS) eai leat ovttaoaivilis diggegotti duomuin.
Deanučázádaga Luossabreavaeaiggádat (DLB) mearridedje mannan vuossárgga stivračoahkkimis Leavvajogas guoddalit Nuorta-Finnmárkku diggegotti duomu, čállá Ságat. Áigemearri guoddalit duomu lea skábmamánu 9. beaivvi.
DLB čálli, Benn Larsen, muitala sii gávnnahedje ovttasráđiid ahte lea buoremus guoddalit ášši lágamánneriektái. Deanučázádaga Luossabreavaeaiggádat (DLB) ja Deanučázádaga Luossabivdosearvi (DBS) stevdnejedje stáhta Dálkkádat- ja birasdepartemeantta bokte diggái go oaivvildedje stáhta lea ođđa Deanusoahpamuša bokte ásahan ođđa vuoigatvuođajoavkku ja rihkkon sihke Norgga lága ja álbmotrievtti. Diggegotti duopmár Bergny Cammermeyer Ofstad gávnnahii ahte sihke Deanučázádaga Guolástanhálddahusas ja Sámedikkis lei váikkuhanvejolašvuohta go ođđa Deanusoahpamuša ráđđádalle, nu mo láhka gáibida. Nu beasai stáhta vuoittu beallai duomus.
