Nussir-ášši meannuduvvo ođđasit Finnmárkku Opmodat (FeFo) stivračoahkkimis čakčamánu, nu mo stivra mearridii Álttá-čoahkkimis geassemánu.
Nussir-ášši meannuduvvo ođđasit Finnmárkku Opmodat (FeFo) stivračoahkkimis čakčamánu, nu mo stivra mearridii Álttá-čoahkkimis geassemánu.
Duogáš dán mearrádussii lea go stivra ii ožžon čálalaš áššeovddidusa mas lei evttohus stivrramearrádussii njukčamánu čoahkkimis.
Danin eai ožžon stivrramiellahtut daid dieđuid áššis maid sis lea riekti oažžut, FeFo siskkáldas njuolggadusaid mielde, čállá FeFo preassadieđáhusas.
– Nussir-ášši lea nu stuora ja dehálaš ášši rievdaduvvon meahccegeavaheami birra, ja das galgá dohkálaš meannudeapmi mas lea čálalaš áššeovddidus stivrabeavddis, dadjá FeFo stivrajođiheaddji Máret Guhttor.
Nussir-ášši meannuduvvo njuolggadusaid mielde Finnmárkkulága paragráfa 10 mielde.
Ovttajienalaš stivra mearridii čoahkkimis geassemánus ahte áššemearrádus sáddejuvvo FeFo dárkkistanlávdegoddái.
Dárkkistanlávdegoddi čujuha sin cealkámušas ahte FeFo stivra lea mearridan boastu jienastannjuolggadusaiguin mii guoska ruovttoluottagohččumii áššis departemeanttas. Ruovttoluottagohččun ferte mearriduvvot jienastusnjuolggádusaiguin Finnmárkkulága paragráfa 10 mielde, nu mo áššemearrádus sáddejupmi mearriduvvui njukčamánu čoahkkimis.
– Dán válddán mielde dego muittuhussan ja dehálaš njuolggadussan stivrra áššemeannudemiide meahccegeavaheami oktavuođas, dadjá stivrajođiheaddji FeFos.
Dárkkistanlávdegoddi cealká ahte das lea bargun bearráigeahččat ahte FeFo doaibma lea oktiiheivehuvvon Finnmárkkulágain ja eará lágaiguin, muhto ii leat bargun árvvoštallat leat go rihkkumat FeFo siskkáldas áššemeannudeami njuolggadusain.
Lávdegoddi cealká vel lassin ahte dat ii leat váiddaorgána FeFo mearrádusaide.
