-Almmuhus-
-Almmuhus-
OĐĐASATMáze­joavkku ovddeš dáidagiid beassat oaidnit ođđa čájá­husas

Máze­joavkku ovddeš dáidagiid beassat oaidnit ođđa čájá­husas

-

-

«Iežamet​​– Det som er vårt» čájáhusas čájehuvvojit Sámi dáiddárjoavkku Mázejoavkku ovddeš dáidagat.

Čájáhus rahppo Guovdageainnu gilišiljus sotnabeaivvi skápmamánu 22. beaivvi dii. 13.00. Mázejoavkku ásahedje gávcci sámi dáiddárá 1978:s, sin gohčodedje Mázejoavkun dahje sámedáiddárjoavkun. Joavkkus ledje Aage Gaup, Trygve Lund Guttormsen (j. 2012), Josef Halse, Berit Marit Hætta, Britta Marakatt-Labba, Hans Ragnar Mathisen, Rannveig Persen ja Synnøve Persen, dieđiha Dáiddadállu preassadieđáhusa bokte.

Álggahedje kollektiivva Mázii

Mázejoavku geahččalii beasat eret majoritehta kategoriseremis, definišuvnnas ja eahpedohkálašvuođas go álggahedje kollektiivva Mázii, Norgga periferiijas. Maid sámi dáiddár sáhttá dahkat, dan mearridedje ieža. Mii lea sámi dáidda, dan mearridedje ieža. Maid sápmelaš sáhttá dadjat, dan mearridedje ieža. Nuorra dáiddárat válde definerenfámu ruovttoluotta.

Manifestašuvdnan Sámi sorjjasmeahttunvuođa čuoččuheapmái

Dál leat dan áiggi dáidagat dego manifestašuvdnan Sámi sorjjasmeahttunvuođa čuoččuheapmái, muhtin dáidagat leat várrogasat ja vuollegaččat, earát fas fámolaččat mat bastilis čalmmiiguin gehččet máilmmi. Dáidagat ​«Iežamet​​– Det som er vårt»​ čájehit oasi dáiddáriid ideálain, áigumušain ja ruohttasiin, muhto dat lea sillejuvvon belohahkii dáiddáriid dáiddaoahpu bokte. Joavku lei guovddáš oassálasti Álttá rahčamušain ja eará álgoálbmogiid iešmearrideami čalmmustahttimiin, ja máŋga dáidaga čájehuvvojedje sápmelaččaid riekterahčamušaid olis.

Dáiddadálu ja RiddoDuottarMuseaid ovttasbargu

Čájáhus «​Iežamet»​ lea sámi dáiddakollektiivva Dáiddadálu ja RiddoDuottarMuseaid ovttasbargu, ja lea oassin digitála dáiddasemináras «EadnámetMaid» mii čájehuvvui álggu geahčen skábmamánu. Seminára čalmmustahttá sisabahkkemiid ja luonddubillistemiid. Lea sámi dáiddárkollektiiva Dáiddadállu Guovdageainnus mii buvttada dan. «EadnámetMaid» lea ožžon doarjaga Office for Contemporary Art Norways, Norgga Sámedikkis, KORO:s, RiddoDuottarMuseain, Norgga Kulturráđis, Davviriikkaid Kulturfoanddas, Fritt Ord vuođđudusas, Davvi-Norgga Dáiddaguovddážis ja Romssa ja Finnmárkku fylkagielddas.

Čájáhusa rahpama birra oainnát Dáiddadálu Facebook-siiddus. Njoammuneastadeami geažil eai leat nu máŋga guossesaji rahpanbeaivvi. Čájáhus bistá gitta ​ođđajagemánu ​29. beaivái 2021. Njoammuneastadeami dihte rahpá Gilišilju uvssaid čájáhussii go​ riŋget tlf. (+47)40611406.

-Almmuhus-