Loabága suohkanstivra lea mearridan Fossbakken giláža sámegielnama.
– Mis lei álbmotčoahkkin Fossbakken gilážis gos olbmot oaivvildedje ahte Fossbáhkku namma dat lea geavahuvvon sámegillii, dadjá Loabága sátnejođiheaddji Hege Myrseth Rollmoen.
Muhto eai buohkat dasa leat miellasat go oaivvildit sámegielnamma galggašii leat eará go Fossbáhkku.
Ruŋggu historjásearvvis oaivvildit ahte Ruŋggugiera lea rivttes namma. Gielas orohat ges evttoha Bokcávuopmi livččii rivttes namma. Lars Joar ja Mai Britt Halonen leaba árvalan máŋga nama, nu go Guolbban ja Boksavuopmi.
Ruŋggu historjásearvi háliida guoddalit suohkanstivrra mearrádusa.
Dan dieđiha NRK Sápmi.
