Dál lea áibbas lunddolaš ahte masá buot mánáin lea mánáidgárdesadji, muhto moaddelot jagi áigi lei dilli áibbas eará.
Dál lea áibbas lunddolaš ahte masá buot mánáin lea mánáidgárdesadji, muhto moaddelot jagi áigi lei dilli áibbas eará.
Diibmá lei badjelaš 90 proseantta Norgga mánáin mánáidgárdesadji, čájehit Statistihkalaš guovddášdoaimmahaga logut.
– Jus geahčesta stuorámus mánáid, de leat masá buohkat mánáidgárddiin. 97 proseantta mánáin gaskal 3-5 jagi leat mánáidgárddiin, dadjá Statistihkalaš guovddášdoaimmahaga oahpahusstatistihka sekšuvnna Elin Såheim Bjørkli.
Lassánan sakka
Statistihkalaš guovddášdoaimmahat ráhkadišgođii mánáidgárdestatistihkaid 1963:s. Dalle ledje dušše 2 proseantta Norgga 1-5 jahkásaččain mánáidgárddis.
1980-logus ges lei dušše 20 proseantta mánáin mánáidgárdesadji.
Lohku lea lassánan dađistaga, 2000-logus vázze 62 proseantta mánáidgárddis ja diibmá ges 91 proseantta.
Oasseáiggis ollesáigái
Logut čájehit maiddái ahte mánát geain lea ollesáigge sadji mánáidgárddis lassánit.
Badjel 97 proseantta mánáidgárdemánáin leat badjel 33 diimmu vahkkui beaivedivššus.
Jagi 2000:s lei 63 proseantta mánáin ollesáiggesadji ja 37 proseantta mánáin oasseáigesadji.
