2023 Rolf Gammleng gudnibálkkašupmi geigejuvvui 11 dáiddárii dán vahkkus. Mari Boine oaččui veteránabálkkašumi mii lea 100 000 ruvnnu.
Dán vahkkus geigejuvvui 2023 Rolf Gammleng gudnibálkkašupmi. Oktiibuot juhke 11 bálkkašumi Norgga dáiddáriidda. Dáiddadoallobálkkašumi ožžo gávccis ja golmmas ges ožžo veteránabálkkašumi.
Artista Mari Boine, neavttár Vivi Sunde ja dánsár Ingunn Rimestad ožžo veteránabálkkašumi. Juohkehaš oaččui 100 000 ruvnnu.
Dáiddadoallobálkkašupmi ges lea 75 000 ruvnnu. Dan juhke Kvelertak musihkkajovkui, neavttárii Kingsford Siayorii, musihkkárii Vegard Johnsenii, musihkkárii Gabriellii, musihkkárii Helge Andreas Norbakkenii, dánsárii Henriette Hamli Grønningenii, dirigentii Grete Pedersenii ja rumbočuojaheaddjái Thomas Gallatinii.
Fond for utøvende kunstnere lea juohkán Rolf Gammleng gudnibálkkašumiid 1982 rájes. Gudnibálkkašupmi lea ožžon dán nama go musihkkársearvvi Rolf Gammleng dat vuođđudii bálkkašumi. Bálkkašupmi geigejuvvo profešunealla musihkkáriidda ja lávdedáiddáriidda.
