Raasten rastah, Aajege ja Røros Kino lágidit sámi filbmabeaivvi Plassje kinos, ja geasuhit gehččiid nuvttá iđitborramušain ovdal go bidjet filmmaid jorrat, golmma kinolanjas.
Raasten rastah, Aajege ja Røros Kino lágidit sámi filbmabeaivvi Plassje kinos, ja geasuhit gehččiid nuvttá iđitborramušain ovdal go bidjet filmmaid jorrat, golmma kinolanjas.
Vuosttaš filbma maid čájehit maŋŋel iđitborramuša lea Vaiana, mii lea mánáide nuvttá.
Filmmat maid muđuid čájehit leat Solens sønn, The Whisperers, Veiviseren, Sameblod, Min mors hemmelighet, The Firekeepers, 7 Sámi stories ja 19 eará sámi oanehis filmma.
Dasa lassin lea sierra mánáidprográmma dán beaivvi, čállet lágideaddjit Facebookas.
Plássje sámiid váhnenfierpmádat guossoha sámi biepmu iđđedis ja beaivvi miehtá. Váldogoahkka lea Hilde G. Danielsen.
Eahkedis čuojaha Ágy, Hagakoia báikkis, gos biđus maid guossohuvvo.
