Cuoŋománu 15. beaivi lea dáhton go miehtá Norgga šaddá gielddusin dolastit olgun.
Cuoŋománu 15. beaivvis gitta čakčamánu 15. beaivái lea gielddus dolastit mehciin ja vuvddiin. Muhtun guovlluin dattetge lea lohpi, jus fal lea dohkkehuvvon árranbáikkis.
Go lea dolastallangielddus, de lea njuolggadus ahte ii leat lohpi cahkkehit dola, ii atnit dolastallangári, ii grilla man dušše oktii sáhttá atnit ii ge eará rabas dolaid cahkkehit.
Gielddus lea buot mehciin, nu go vuvddiin gittiin, sulluin, čáhcegáttiin ja eará guovlluin ge.
Eanemus buollimat go lea gielddus
Diibmá ledje 1253 meahcce- ja suoidnebuollima Norggas čájehit logut maid Servodatsihkarvuođa- ja gearggusvuođadirektoráhtta lea čohkken. Eanas dain buollimiin dáhpáhuvve dan áigodagas go lea dolastallangielddus.
– Geasset lea dávjá goikkis ja de sáhttá unna hilaš ge bullehit eatnama ja dagahit váralaš buollimiid ja billistit ollu. Leat buorit ákkat dasa manne dolastallangielddus oba gávdno ge, ja mis lea buohkain ovddasvástádus hehttet buollimiid luonddus, dadjá Norsk Friluftsliv generálačálli Bente Lier preassadieđáhusas.
