-Almmuhus-
-Almmuhus-
OĐĐASAT – Manne eai duostta searvat?

– Manne eai duostta searvat?

-

-

Unnán eiseválddit leat searvan boazodoallokonferánsii mii dáid beivviid lágiduvvo Troandimis. – Dat lea assimileren, lohká okta boazodoalli.

– Mun livččen háliidan beassat sin čalmmiide geahččat ja jearrat gažaldagaid, go leat máŋga ášši boazodoalus maid birra ledjen háliidan hállat, lohká Egon Kappfjell.

Kappfjell guhte gullá Voengel Njaarke orohahkii Nordlánddas, lea okta dain birrasiid 300 olbmos, geat servet boazodoallokonferánsii mii dál lágiduvvo Troandimis.

 

– Ain seamma dilis go Elsa Laula áiggis

Konferánssas, man Norgga Boazosápmelaččaid Riikkasearvi (NBR) ja Eanandoallodirektoráhtta ovttas lágidit, leat boazodoallit sihke suomabeale, ruoŧabeale ja norggabeale Sámis.

Eiseválddiid bealis gal leat unnán oasseváldit.

Vuosttaš konferánssabeaivvi ledje guohtoneatnamat ja sisabahkkemat fáddán, ja konferánssas ledje iešguđetlágan dutkit ja áššedovdit logaldallin, dása ii duhtan gal Kappfjell.

Son válddii ge sánesaji konferánssas ja ohcalii vástádusaid mearrideddjiin, vástádus maid oaččui lei ahte sii eai leat báikkis.

– Mun in ádde gal manne mii galgat dáid áššiid digaštallat dutkiiguin, manne ovddasvástideaddji eiseválddit eai duostta searvat? Dat mearkkaša ahte leat ain seamma dilis go Elsa Laula áiggis, 100 jagi dassái, lohká Kappfjell Ávvirii maŋŋil.

 

– Diet leat oalle garra sánit?

– Jua, dat leat garra sánit, muhto olmmoš beaivválaččat eallá dán assimilerenpolitihkas maid diet fievrredit, ja dát lea juste ovdamearka dasa. Go eai leat báikkis go mis leat konferánsa.

 

Ovddeš boazodoallohoavda doarjjui

Dákka maŋŋil go Egon Kappfjell lei váldán sánesaji, de lei doppe nubbi guhte doarjjui su.

Nammalassii ovddeš boazodoallohoavda Ellen Inga O. Hætta, guhte logai ahte su mielas lei imašlaš vástádus maid Kappfjell oaččui ja ahte hálddašeaddjit ja mearrideaddjit eai galggašii ballat searvamis digaštallamiidda.

– Eiseválddit dieđus leat mielde lágideamen dán konferánssa ja dainna lágiin leat mielde das, muhto mun jurddašan ahte go boazodoallit ná hástalit hálddašeddjiid, de livččii mu mielas hui lunddolaš ahte sii juoidá lohket. Oaivvildan ahte sis fertejit gal leat maid oaivilat, go juohke háve go čállet áššečilgehusa de han oaivvildit juoidá. Dákkár konferánssas gos galgá boahtteáiggi birra hupmat, ii sáhte leat nu ahte dain eai leat makkárge meinnegat, čilge Hætta Ávvirii.

 

– Hálddašeaddjit fertejit maid juoga oaivvildit.

Hætta lohká hui bures áddet dan go Egon Kappfjell moaitá eiseválddiid go eai leat konferánssas.

– Mun gal ipmirdan su hui bures. Mun vásihin ieš go ledjen boazodoallohoavda, ahte dákkár konferánssain olbmot sáhtte hástalit mu, iige de sáhte goit beare čohkkát iige vástidit olbmuide. Nu ahte ipmirdan bures ahte boazodoallu dan jearrá, lohká son.

Hætta dattege ii loga gal áigut iežas konkluderet ahte dilli lea ain nu mo lei 100 jagi dassái.

– Muhto mun jurddašan dainna lágiin ahte go dat ovttas lágidit dán ja dat leat hálddašeaddjit, de eai sáhte dušše lohkat ahte dat lea dušše politihkkáriid ovddasvástádus, hálddašeaddjit fertejit maid juoidá maid nu oaivvildit, lohká Hætta.

 

– Ii beasa jietnadit maidege

NBR jođiheaddji Ellinor Marita Jåma, iige lean duhtavaš dainna go unnán eiseválddit ledje čoahkkimis.

Eanandoalloministtar gal galledii konferánssa álggu, muhto fertii vuolgit go galggai eará čoahkkimiidda.

Gielda- ja ođasmahttindepartemeantta bealis ges ledje sádden stáhtačálli Bjørnar Laabak čuovvut konferánssa.

Jåma muitala ožžon dieđu ahte stáhtačálli galgá dušše guldalit čoahkkima, iige jietnadit maidege.

– Nu ahte dat ii beasa jienádit dáppe maidege, leimmet gal vuordán ahte son muitala juoga iežas ovddasvástádusa birra, dan ii dahkan ja dainna gal lean hui beahtahallan, lohká Jåma.

Jåma muitala eanandoalloministara šállošan go ii astan čuovvut konferánssa guhkit.

– Son dattege guđii gal iežas stáhtačálli deike, nu ahte dat lea dáppe gullamin min ja doalvu daid viidásat ministarii. Muhto diehttelasat lei ministtar ieš galgat leat dáppe, ja dan gal lean mun maid lohkan sutnje, lohká Jåma.

 

– Ii lean šihtton
Gielda- ja ođasmahttindepartemeantta stáhtačálli Bjørnar Laabak vástida Ávvirii e-poastta bokte ná:
– Lei eanandoallo- ja biebmoministtar Jon Georg Dale guhte ovddastii ráđđehusa boazodoallokonferánssas. Mun háliidin leat báikkis gullan dihte miellagiddevaš digaštallama, ja dat lei šihtton lágideddjiin. Go bohten báikái, de lei lágideaddji fáhkka rievdadan prográmma ja bidjan munnje 20 minuvtta guhkkosaš sáhkavuoru. Dát ii lean šihtton, mun in lean ráhkkanan dasa ja dan mun dadjen lágideaddjái, čállá son.
 


BEAHTAHALLAN: NBR jođiheaddji Ellinor Marita Jåma.
Govven: Berit Marie Lise Eira.

 

 

 

 

 

 

 

 

 

 

 

 

 

 

 

 

 

 

 

- Advertisement -
-Almmuhus-