Guovdageainnu nieida Inger Marita Bals (20) lea Ávvira journalista, muhto maiddái áŋgiris valáštalli. Moadde mánu dassái dajai ge váhnemiidda áigut vuolgit Dubaijii čađahan dihte persovnnalaš hárjeheaddjeskuvlla. – Mun jáhkán Inger Marita birge bures. Son lea jo rávisolmmoš, lohká áhčči Per M. Bals.
Iežas mánnávuođa rájes lea Inger Marita beroštan giehtaspáppas, spábbačiekčamis ja čuoigamis.
– Joatkkaskuvllas, go ledjen birrasii 15-16-jahkásaš, de hárjehallagohten vel gievrudahttima. Lean leamašan hui aktiiva mánnávuođa rájes, muitala Inger Marita, guhte beaivválaččat bargá Ávviris.
Bearjadaga Bals ja birrasiid 35 eará lášmadis olbmo vulget olgoriikii, Dubaijii, gos áigot fárrolaga vázzit Akademiet for personlig trening, Persovnnalaš hárjehallama akademiija, nammasaš skuvlla. Skuvla bistá mánu ja addá gelbbolašvuođa bargat persovnnalaš hárjeheaddjin. Seamma skuvlla lea ovdal čađahan maiddái eará Guovdageainnu nieida, namalassii Inga Marja Sarre.
Go háliida seammás vásihit juoidá
Persovnnalaš hárjehallama akademiija gávdno maiddái Oslos, Norgga oaivvegávpogis. Das lea juste seamma sisdoallu skuvlejumi dáfus. Danin Inger Marita ii jáhke skuvlla nama dahje man nu eará váikkuhan su válljejupmái vuolgit Dubaijii.
– Mun lean jo guhká jurddašan, muhto in leat mearridan goas ja gos vuolgit. Sullii mánu dassái mearridin de. Seammás beasan vásihit eará riikka. Dál gal in dieđe vuos maid vásihan. Dan gal ferten oaidnit easka go dohko boađán, muitala Bals.
– Son lea goit ieš mearridan vuolgit dohko
Inger Marita ii loga leamašan makkár ge eavttuid, ii ge lohpidan bargat vai váhnemat suvvet su vuolgit Dubaijii. Áhčči Per M. Bals muitala ahte eaba leat vuos nu mielas dasa.
– Son lea goit ieš mearridan vuolgit dohko. Mii goit ávžžuheimmet ahte ii vuolgge dohko, sáhtášii eará sadjái vuolgit. Ii gal duođi eambbo.
– Mun goitge jáhkán Inger Marita birget bures. Son lea jo rávisolmmoš. Dat gal manná bures doppe.
Báhkka soaitá šaddat hástalussan
Dubai lea gávpot gos gaskamearálaš olgotemperatuvra lea 40 lieggagráda. Inger Marita ii loga vuosttaš háve go vuolgá lieggariikii, muhto vuosttaš háve go lieggariikkas galgá vel hárjehallat ollu.
– Mun lean ovdal leamašan lieggariikkain, muhto in leat hárjehallan doppe. Dán mátkkis áiggun hárjehallat, muhto in dieđe movt dat manná go lea na báhkka.
Dubai, gos ásset sullii 2,5 miljovnna olbmo, lea stuorámus gávpot Ovttastuvvan arábaemiráhtain. Bals veahá sáhkkii ovdal go vuolgá, ja danin ge lea ohcan dieđuid interneahtas báikki birra gosa jo vuolgá bearjadaga.
– Earenoamáš gávpot. Doppe lea visot eará ládje go dáppe. Doppe lea maiddái máilmmi stuorámus slalomaguovddáš mii lea stuorra viesu siste, oanehaččat muitala Inger Marita.
– Galget buvssat mat ollet čippiid rádjái ja báidi mii manná olggiid badjel
Go Bals olle Dubaijii de álgá doppe isláma bassimánnu, Ramadan.
– Dat mearkkaša ahte eai bora dan rájes go beaivi badjána dassážii go beaivi luoitá. Dan mánu ii oaččo álás vázzit doppe. Galget ge leat buvssat mat leat čippiid rádjái ja báidi mii manná olggiid badjel.
– Beasat go de beaivváža návddašit, gálašit?
– Doppe lea lohpi gálašit, lea lohpi bikiniin sáttogáttis vázzit.
Muđui ii loga áigut váldit fárrui nu ollu, dušše geassebiktasiid, pássa, mátketelefovnna ja ruđa.
Fárre dohko gos fidne barggu
Inger Marita hárjehallá ollu. Liiko čuoigat, sihkkelastit, viehkat, ja lovttohallat veavttaid. Hárjehallá ge 4-6 gearddi vahkkui danin. Alddis ii loga vuos čielga mihtu.
– Olahit ođđa olahusaid. Ovdánit čađat juohke ládje. Lovttohallat eambbo veavttaid, buoridit áiggi viehkamis ja čuoigamis.
Go čađaha Persovnnalaš hárjehallama akademiija de áiggošii bargat persovnnalaš hárjeheaddjin gievrudahttimis, ja danin soaitá fárret eará sadjái.
– Soaittán bargagoahtit hárjeheaddjin, muhto dalle ferten fárret dohko gos oaččun barggu.
– It go álgge bargui deike Guovdageidnui?
– Soaittán, oanehaččat vástida nieida.
