Inger Marita Bals láidesta sáddaga maiddái dán jagi, muhto vehá earáládje go ovdal.
Ávvir lea máŋga jagi juo sádden sierra neahttasáddaga sámi álbmotbeaivvi. Ávvira váldodoaimmaheaddji Kari Lisbeth Hermansen muitala ahte dán jagi leat veaháš rievdadan sáddaga hámi. Dál ii leat studio.
– Min prográmmajođiheaddji Inger Marita Bals ja neahttadoaimmaheaddji Máret Inger Aslaksdatter Anti, gii lea jođihan sáttabargguid, leaba baicce finadan feara gos sámi gielddas Kárášjogas gos ovdanbuktiba eará osiid ávvusáddagis. Jurdda lea leamašan dán vuoru veaháš dán sámegieldda máŋggabealatvuođa čalmmustahttit, muitala Hermansen.
Juohkelágán fáttát
Ávvira neahttadoaimmaheaddji, Máret Inger Aslaksdatter Anti, muitala ahte ávvubeaivesáddagis leat fáttat nugo ávvubeaiveborramuš, čiŋadeapmi, heargegilvvohallan ja njoarostangilvvut, ja šaddá maid dieđusge sáhka das makkár buriid Sámi álbmotbeaivvi ávvudeapmi lea duddjon servodahkii.
– Mii háleštit maid olbmuiguin geat leat áigeguovdilat bargguideaset geažil leamašan maŋemus áiggiid. Ja mii lea vel ávvubeaivi njálgga borramuša haga? Mii leat ge hástalan goahka hábmet ávvubeaivve-fálu ja sáddagis beassat ge oahppat gohkket juoidá eará go dan árbevirolaš sámi álbmotbeaivvibiepmu, biđđosa. Dát borramuš lea buorre molssaeaktun dasa, lohká Máret Inger.
Beaivi mii lea lokten máŋga artistta
Sámi álbmotbeaivi lea šaddan mánáid stuora ávvubeaivin ja skuvllain ja mánáidgárddiin miehtá sámi barget dáinna fáttain. Anti lohká leat lunddolažžan ahte mánát maid ožžot buori saji min sáddagis.
Ávvubeaivvesáddagis lea maid luohti ja musihkka. Prográmmabuvttadeaddjit eai háliit vel muitalit guđiid artisttaid sii leat bovden dán jagi, muhto dan han oaidná go geahččá sáddaga.
– Sámi álbmotbeaivvi ávvudeapmi lea rahpan olu vejolašvuođaid ja buktán olu lávddiid sámi artisttaide, juigiide ja kulturbargiide. Unnit ja stuorát báikkiin leat doalut dan beaivvi, ja maiddái min sáddagis loktet mii oidnosii luođi ja musihka. Beassat gullat sihke juoigama ja čáppa lávluma, dadjá Anti.
Ávvir ávvubeaivvesáddaga geahčat Ávvira neahttasiiddus Sámi álbmotbeaivvi diibmu 18.00. Jus juste dalle it olle geahččat, de sáhtát maŋŋel maid dan geahččat avvir.no-siiddus.
