Trygg Trafikk ávžžuhit várrogasat vánddardit.
Trygg Trafikk ávžžuhit várrogasat vánddardit.
Dušše dán jagi leat 89 olbmo duššan biilajohtolagas.
Dál lea dálvi boađi-boađi, ja Trygg Trafikk ávžžuha olbmuid leahkit várrogassan luottaid alde.
Sii ávžžuhit heivehit leahtu ja ráhkkanit jus heajos siivu ja gálja lea.
Golggománu dušše 11 olbmo johtolagas, čieža dievddu ja njeallje nissonolbmo.
Diibmá seamma mánu dušše liikká olu olbmot.
Lonut dálvejuvllaide
Olu sajiin riikkas leat juo njalka luottat, galbmaceahkit ja muohta.
Liikká leat ain olusat geat eai leat molson dálvejuvllaide.
– Mii oaidnit ahte olu lihkohisvuođat mat dálvet dáhpáhuvvet, leat biillat main leat geassejuvllat dahje heajos dálvejuvllat. Lea várálaš jus eai leat albma dálvejuvllat, lohká Jan Johansen. Son lea Trygg Trafikk direktevra.
Ale vuoje leahtuin, ja čuovo mielde
Johansen lohká maid ahte ii leat dušše juvlalonuheapmi maid ferte jurddašit go dálvi boahtá.
Juohke biilavuoddji ferte maid jurddašit.
– Eanaš lihkohisvuođat leat vuoddji sivva. Dálvesiivun lea bággu unnidit leahtu. Erenoamáš dehálaš lea dat mohkiin ja alážiin, ferte maid buorre gaskka olbmuide, sihkkelastiide ja eará biillaide. Biila sáhttá čierastit njeallje geardde guhkkelii dálvesiivun go geassesiivun, čilge Johansen.
Váruha oktiibeaškkehemiid
Eanaš oasis Norgga luottain ii leat gasku juohku.
Go lea njalkkas, de lea váráleabbo šaddat vearu beallái luotta.
Jus vuoddji ii nagot čuovvut luotta, de sáhttá massit coavcci ja jorihit. Dát sáhttá geavvat alcces ja biilii mii ovddal boahtá.
Danne ávžžuha Trygg Trafikk doalahit leahtu dan dásis vai olmmoš nagoda bisánit.
