Guovdageainnu suohkan lea fállan buoret eavttuid mánáidsuodjalusa bargiide, ja bisuhit guoktása ain barggus.
– Lea buorre go soai joatkiba ja go dás ii šaddan nu stuora hástalus go leimmet jáhkkán, dadjá suohkandirektevra Karin Hætta.
Juovlamánu álggus bekkii ahte Guovdageainnu suohkana golbma bargi mánáidsuodjalusossodagas leat cealkán eret barggu ja galge luohpanáigodaga vel bargat.
Muhto dan rájes leaba guovttes dan golmma bargis rievdadan oainnu, ja geassán ruovttoluotta eretcealkima. Mánáidsuodjalusa jođiheaddji ja nubbi, gii bargá konsuleantavirggis, joatkiba barggus. Jođiheaddji lea juo guhkit áiggi bargan mánáidsuodjalusas.
Ohcet ovtta bargi dál
Suohkandirektevra Karin Hætta muitala ahte dat okta bargi gal heittii ovdal juovllaid.
– Muhto mis leat ain guokte bargi geat leaba geassán ruovttoluotta. Dan ovtta guoros virggi mii almmuhit fargga.
Suohkandirektevra Hætta ii muital gal juste maid sii fálle nu ahte bisuhedje dán guoktása.
– Ledje máŋga iešguđet ášši. In sáhte muitalit detáljaid, go dat gal lea personálaášši. Muhto mii leat gulahallan ja hupman ja dat leaba válljen de bissut virggiin, dadjá Hætta.
Politiijat dutkame áitagiid
Skábmamánu 20. beaivvi almmuhii suohkan iežaset ruovttusiiddus čállosa «Mánáidsuodjalus Guovdageainnu suohkanis» mas muitaledje ahte mánáidsuodjalusossodaga bargit leat vásihan cielahemiid ja áitagiid. Dan oktavuođas lea suohkan dieđihan ášši politiijaide, ja bargit leat hupman sihke politiijaiguin, Hemis ásahusain ja Bufetáhtain.
Suohkandirektevra ii loga gullan maidege politiášši birra šat dán rájes, ii ge loga gullan eanet áitagiid ii ge unohis dieđuid birra mat leat boahtán mánáidsuodjalusa bargiide. Eretcealkimat bohtet maŋŋel go ášši lei váidon politiijaide, ja Hætta duođašta ahte bargit ledje earret eará dáid dihte cealkán eret virggiid mánáidsuodjalusas. Muhto suohkan ii leat gal sihkarvuođa dáfus sáhttán goitge fállat nu olu eará go ahte sáhttet joatkit ain lássemis uvssa.
– Mii eat sáhte nannet sihkarvuođa earáládje go atnit uvssaid lásas. Lassi doaimmat gal leat politiijaid duohken mearridit, dadjá Karin Hætta.
Karin Hætta lohká iežaset joatkit ain barggu movt galget ovttasbargagoahtit ránnjásuohkaniin Kárášjogain.
