Dál leat Riddu Riđđus ohcame jienaid ođđa mánáidfilbmii, ja buohkain lea vejolašvuohta geahččalit dubbet.
Sara Margrethe Oskal lea ožžon barggu jorgalit ođđa muumi-filmma sámegillii, ja son leage dál Riddu Riđđus ohcame neavttáriid geat sáhttet dubbet filmma.
– Mu mielas lea dát hui earenomáš, go de besset sámi mánát geahččat sámegielat filmma kinos, ja mu dieđu mielde ii leat kinos ovdal čájehuvvon sámegielat mánáidfilbma, muitala Oskal.
Filmkompaniet Alpha lea dál buvttadeame muumi filmma, mii čájehuvvo juovlamánus.
– Dat lea suoma buvttadeaddji gii lea ráhkadeame ođđa filmma, ja sii háliidedje filmma maid sámegillii, muitala Oskal.
Filmmas leat máŋga unna rollaža maid ferte dubbet, ja Oskal háliidivčče filbmii neavttáriid miehtá Sámi.
Filbma dubbejuvvo Tromssas, ja dan dihte háliidivčče Oskal dubbejeddjiid geat orrot Tromssa lahka.
Lea vejolaš geahččalit dubbet muumi filbmii Riddu Riđđus bearjadaga eahkes ja lávvordaga iđitbeaivvi.
