SÁNAG oažžu dán jagáš mánáiddearvvašvuođabálkkašumi. Bálkkašupmi geigejuvvo Bergenis odne.
SÁNAG Kárášjogas oažžu Mánáiddearvvašvuođabálkkašumi. Lea psyhkalaš dearvvašvuođasuddjema ja gárrendilledivššu mánáid ja nuoraid ovttadat mii oažžu bálkkašumi.
Norgga mánáiddoaktáriidsearvi ja mánáidáittardeaddji juhket bálkkašumi heivvolaš kandidáhtaide. Dán jagi geigejuvvo bálkkašupmi mánáiddoaktáriidbeivviid oktavuođas mat lágiduvvojit Bergenis.
Stuorra gudni ja movttiidahtti
SÁNAG:s vulget golbma bargi Bergenii vuostái váldit bálkkašumi. Anne Karin Steffensen lea okta sis.
Su mielas lea somá go sin ovttadagat ožžot ánssu ja dohkkehusa barggu ovddas maid sii barget sámi mánáid várás miehtá Norgga.
– 2005 rájes lea dát viđát geardde go juhket bálkkašumi, ja dat han dagaha dán nammadeami vel ain eanet erenoamážin, muitala Steffensen. Okta gii ovdal lea ožžon dán bálkkašumi lea Jens Stoltenberg. Son oaččui dan boahkkudanfoandda barggu dihte.
(Ášši joatká gova vuolábealde)
Maiddái SÁNAG jođiheaddji Gunn Heatta mielas lea dát nammadeapmi stuorra gudnin.
– Dát movttiida min, sihke jođiheddjiid ja bargiid, ain joatkit bargat ovddidit sámi mánáid dearvvašvuođa. Mii movttiiduvvojit joatkit bargguin váikkuhit dan guvlui ahte sámi kultuvra ja giellamáhttu stuorru.
Stuorát áddejupmi ja buoriduvvon praksis
Mánáid ja nuoraid ovttadagat Kárášjogas ožžot bálkkašumi go leat nannen psykalaš dearvvašvuođasuddjema kvalitehta ja buoridan sámi mánáid dearvvašvuođadili Norggas.
Namuhuvvo ahte leat bargiid guhkit áigge rahčamušat ja barggut dutkama, oahpaheami, bagadallama ja klinihkalaš bargguid oktavuođas mat leat dehálaččat bálkkašumi nammadeamis.
Guovddáš lea maid seammás nagodan hukset transkultuvrralaš mánáid ja nuoraidpsykiatriija gelbbolašvuođa buori jođiheami bokte.
SÁNAG lea váikkuhan buoret praksisii ja stuorát áddejupmái dain fágasurggiiguin, mii fas lea dagahan ahte unnitlogu álbmogiid mánáiddearvvašvuohta lea buorránan Norggas.
SÁNAG psyhkalaš dearvvašvuođasuddjen ja gárrendilledikšu – mánáid ja nuoraid fálaldat lea juohkásan njealji ovttadahkii: Bearašovttadat, Mánáid- ja nuoraidpsykiatriija poliklinihkka, Johtti bargiidjoavku, Sámi nuoraidpsykiatriijajoavku, fágaidrasttildeaddji spesialiserejuvvon gárrendilledikšu ja Nuoraidpsykiatriija ovttadat.
