Dán rádjái leat badjeolbmot gávdnan vihtta jápmán bohcco, ja maiddái reiton áldduid.
– Dát šaddá midjiide divrrasin, go álddut reitojit. Eat mii sáhte diehtit mo de manná, ahte šaddetgo miesit, dadjá Muttošjávrri bálgosa boazodoalli Leo Aikio Yle Sápmái.
Loahpas ledje ožžon gitta beatnaga ja dolvon dasa geasa gullá. Aikio sávvá beatnagis lea dáhkádus. Suoma beale lága mielde beana ii galgga leat luovos, muhto galgá leat báttis.
Luovosbeatnagat leat dagahan vahágiid juohke giđa maŋimuš jagiid, dieđiha Yle Sápmi.
