Stuorradiggeáirras oaivvilda Deanočázádaga leat dakkár dilis ahte fertejit jođánit biddjot doaibmabijut buoridan dihte luossanálehálddašeami.
– Deanučázádaga luossabivdu lea regulerejuvvon 1989 norgga-suoma šiehtadusa bokte. Fargga golbma jagi lea Norga ja Suopma geahččalan ođđasit šiehtadallat, muhto ii leat ovdánan. Báikkálaš olbmot, earret eará Deanu ja Kárášjoga sátnejođiheaddjit, leat fuolas luossahivvodaga dáfus ja go šiehtadus ii doaimma ulbmiliid mielde, dajai Gurutbellodaga stuorradiggeáirras Ola Elvestuen gažadandiimmus.
– Eahpesihkaris dilis
Son jearai mo dálkkádat- ja birasministtar Tine Sundtoft (O) boahtá váikkuhit dasa ahte ođđa šiehtadumit buktet bohtosiid mat sihkkarastet Deanučázádaga luossahivvodaga.
Ministtara vástádusas bođii ovdan ahte departemeantta maid lea fuolas Deanučázádaga luossahivvodaga hálddašeami dáfus, ja ahte leat árvvoštallamin loktet šiehtadallamiid politihkalaš dássái. Elvestuen lea duđavaš go Sundtoft čuovvu šiehtadallamiid ovdáneami, ja go čájeha áddejumi ášši dehálašvuođa dáfus. Elvestuen dattege oaivvilda ahte departemeantta berre jođánat doaimmaid bidjat johtui.
– Deanučázádat lea eahpesihkaris dilis dál, ja Norgga ja Suoma eahpečielggaduvvon šiehtadus dagaha badjelmeare bivddu, erenoamážit suomabeale. Mun oaivvildan ahte dál lea jo dárbu loktet šiehtadallamiid politihkalaš dássái, dadjá Elvestuen preassadieđáhusa bokte.
Hoahpuha ásaheami
Elvestuen oaivvilda maid ahte norggabeale sáhttet bidjat doaibmabijuid buoridan dihte luossanáli hálddašeami, beroškeahttá dálá šiehtadallamiin.
– 2015:i stáhtabušehttii oaččui Gurutbellodat dorjojuvvot ahte Detnui ásahuvvošii našunála luossaguovddáš. Deanučážádaga dili dihte lea dál hoahpu dán oažžut áigái, ja dan ferte dálkkádat- ja birasministtar hoahpuhit, dadjá Elvestuen.
