Bargiidbellodaga sáhttá eahpitkeahttá lohkat fylkkadiggeválgga vuoiti Finnmárkkus.
Rukses bellodat, Sosialisttalaš gurutbellodat, Guovddášbellodat, Birasbellodat, Gurutbellodat, Kristtalaš álbmotbellodat, Ovddádusbellodat ja eará bellodagat ožžo buohkat vuollel logi proseantta. Dušše Olgešbellodagas lea eambbo go logi proseantta.
– Mun lean nu rámis go lea nu bures mannan Bargiidbellodagain ja háliidan giitit buohkaid geat leat dahkan dan vejolažžan, lohká Finnmárkku fylkkadikki sátnejođiheaddji ja sátnejođiheaddjievttohas Runar Sjåstad Čáhcesullos.
– Mii oažžut 17 áirasa fylkkadiggái, dárbbašat 18 áirasa, dalle leat eanetlogus, čilge Bargiidbelloda nuppi fylkkadikke evttohas Ragnhild Vassvik Kárášjogas.
Háliida ovttasbarggu
Vaikko Bargiidbellodat measta lea eanetlogus, de háliida Runar Sjåstad maŋimuš áigodaga ovttasbargobellodagaid fárrui dán háve maid. Bellodagat leat Sosialisttalaš gurutbellodat, Guovddášbellodat ja Kristtalaš álbmotbellodat.
– Mu mielas leat dát ovttasbargu doaibman bures, ja mus lea miella bovdet dáid bellodagaid ovttasbargui. Politihka šaddá buoret dalle. Dasto šaddet šiehtadallamat.
Bargiidbellodaga nuppi fylkkadikke evttohas Ragnhild Vassvik mielas lea mannan erenoamáš bures Bargiidbellodagain dán válggas.
