Báikkis ii leat leamašan doaibmi bensinstašuvdna 2017 rájes.
Dál besset lujávrilaččat deavdit boaldámuša iežaset fievrruide ruovttubáikkis go golggotmánu čihččet beaivvi rájes bensinstašuvdna rabai uvssaid gávppašeddjiide.
Jagi dassái mearridii Murmánskka ráđđehus ovttas gávpedoaimma ovddasteddjiiguin hukset stašuvnna Luájvrái. Beali lea ruhtadan regionála bušeahtta, nuppi beali ruhtadii fitnodat. Obbalaš bušeahta lea 30 miljovnna rubela dahje birrasii 5 miljovnna ruvnno.
Dál lea fálus golbma boaldámuša, nu go diesel, bensiidna -95 ja bensiidna -92. Dasa lassin stašuvnnas galgá vejolaš láddet el-biillaid.
Dan rádjái lágamus bensinstašuvdna lea leamašan kránnjábáikkis Revddas mii lea 27 kilomehtera duohken.
