Luđiin áigu Sara Marielle Gaup Beaska váikkuhit máilmmi jođiheddjiid ON-dálkkádatčoahkkimis Parisas, ja ávžžuha olbmuid oahppat luođi mainna bissehit dálkkádatrievdamiid.
Luđiin áigu Sara Marielle Gaup Beaska váikkuhit máilmmi jođiheddjiid ON-dálkkádatčoahkkimis Parisas, ja ávžžuha olbmuid oahppat luođi mainna bissehit dálkkádatrievdamiid.
Árktalaš guovlluin Davvi-Europas, gos sámit ásset, lea dálkkádatrievdan váikkuhan ahte temperatuvra lea badjánan 1,5 cehkiin.
Dutkit oaivvildit ahte jus máilmmi jođiheaddjit eai buorit dálkkádatpolitihka maŋŋel dálkkádatčoahkkima (COP21) Parisas, de sáhttá jo leat beare maŋŋit. Danne lea Sara Marielle Gaup Beaska vuolgime Parisii ja áigu dahkat buot maid sáhttá ja máhttá vai váikkuha máilmmi jođiheddjiid.
Bissehit ovdal manna endorii
– Jus mii eat nagot bissehit dálkkádatrievdama ja globálalaš liegganeami de minguin manna endorii, lohka Gaup Beaska filmmažis mii lea neahtas.
Filmmas son juoigá «Gulahallat Eatnamiin» luođi, eaŋgalasgillii «We Speak Earth». Mihttu lea olbmuid oažžut juoigat luođi olles čoddaga nu ahte gullo gitta bajimus politihkkariid váimmuide.
Son ávžžuha maid buohkaid oahppat luođi vaikko eai leat vuolgime Pariisii juovlamánu 12.beaivvi 2015, ja son sávvá ahte buohkat filbmejit iežaset go juiget luođi ja bidjet dan filmma internehttii.
Oktanaga juoigat
Parisas áigu Gaup Beaska searvat iešguđetlágan kultuvrralaš doaluide gos galgá doallat konsearttaid ja oahpahit olbmuide juoigat.
Miellačájeheapmi Parisas ON-dálkkádatčoahkkima vuolde vurdet šaddat stuorimus miellačájeheapmi máilmmis goassege. Mihttun lea oažžut gaskal 500 000 gitta 1 millijovnna miellačájeheaddji oktanaga juoigat «Gulahallat Eatnamiin» Parisa gáhtain.
Geahča filmmaža:
Álggaha viehkama luđiin
Luohti maid Sara Marielle Gaup Beaska lea bidjan, galgá leat vuolggajietna go «Run for your life» viehkanstafeahtta vuolgá Gironis skábmamánu 9.beaivvi.
Davimusas Europas, áigot olbmot viehkat Parisii gos máilmmi stuorámus dálkkádatčoahkkin lea. Viehkanstafeahtta lea 4000 km ja galget ollet Parisii skábmamánu 29.beaivvi. Vai galget ollet Parisii dan áigodagas, de fertejit viehkat birra jándora ja leat moadde duhát olbmo geat fertejit viehkat. Viehkan filbmejuvvo ja lea njuolggosátta runforyourlife.nu siiddus.
Symbolihkka
Filmmažis mas Sara Marielle Gaup Beaska juoigá, váldá son geađggáža jogas. Dat geađgi galgá leat «stafeahttasoabbi» viehkamis. Symbolalaš geađgi lea vižžon ovtta Áillohačča divttain, movt geađggi čanastagat eatnamii leat.
“Váldit geađggi gihtii ja doallat dan čorpma siste
dassážii go dat álgá coahkkit, eallit, hupmat ja lihkadit”
Áillohaš
Nils Aslak Valkeapää
