Beaivváš Sámi Teáhter ja NRK Sápmi bidjaba sámi suohkaniid bajimussii dan listui gos leat eanemus dáiddárat Norggas.
Beaivváš Sámi Teáhter ja NRK Sápmi bidjaba sámi suohkaniid bajimussii dan listui gos leat eanemus dáiddárat Norggas.
Raporttas man Telemarksforskning lea dahkan Finnmárkku fylkkasuohkana ovddas, veardidit gos lea eanemus dáiddalašvuohta . Dat raporta, masa leat atnán 2013 loguid, čájeha ahte Guovdageaidnu lea bajimus dáiddársuohkan ja lávdedáiddasuohkan Norggas.
Guovdageainnus leat 9,9 dáiddára juohke duhát ássis, ja dán iskamis leat lohkan galles leat dieđihuvvon dáiddárorganisašuvnnaide.
Ollu mediabargit
Kárášjogas leat ges eanemus kulturbargit olmmošlogu ektui.
Juohke duhát ássis leat doppe olles 70,4 kulturbargi. Mediaásahusaid bargiid rehkenastet maid kulturbargin, ja Kárášjogas lea dat lohku 49,7.
Guovdageainnus leat maid erenoamáš ollusat dáiddalaš buvttadeamis, 21,8 juohke duhát ássis, ja bargit leat sihke Beaivvážis, Juhls gollečeahpis ja Duodjeinstituhtas, lea čállon raportii.
– Dát čájeha ahte stuora kulturásahusat maid Stáhta ja guovllu eiseválddit ruhtadit, maiddái leat hui dehálaččat kulturfálaldagaide ja kulturbargosajide Finnmárkkus, nugo Beaivváš Guovdageainnus, Dansarena nord ja Stellaris DansTeater Hámmárfeasttas ja NRK Sápmi Kárášjogas.
Nu dadjá fylkka kulturhoavda Marianne Pedersen Finnmárkku fylkkasuohkanis iežaset neahttasiidduin.
Davvesiiddas eanemus konsearttat
Finnmárkkus lea Unjárga bajimusas museasuorggis. Davvinjárga lea bajimusas kinodoaimmas. Čáhcesullos atnet eanemus rávisolbmotgirjerádjosa. Muosát lea ges kulturskuvlasuohkan. Davvesiiddas leat eaneamus konsearttat ja eaktodáhtolaš bargit, go doppe leat olles 60,5 miellahtu juohke duhát ássis.
Statistihkkii leat adnon konseartalogut maid leat dieđihan Tonoi, ja kulturhoavda imaštallá vehá go Davvesiida lea das bajimusas.
– Leat máŋga musihkkafestivála ja olu konsearttat fylkkas, nu ahte dás gal eai sáhte leat dieđihan dohko visot. Dákko gal fertet buorránit Finnmárkkus, dadjá kulturhoavda.
Finnmárku lea ovccádin bajimusas olles Norggas das man olu dáiddalaš doaibma olmmošlogu ektui. Nu čájeha Norgga kulturindeks 2014, mas buohtastahttet njeallje davimus fylkka ja vel Sogn og Fjordane. Kulturindeksas leat juohkán dáiddasuorggi logi sadjái. Eanemus čuoggáid oažžu lávdedáidagis ja museain, ja lea čeahpimus olles Norggas dain surggiin. Unnimus čuoggáid bibliotehkaid ovddas.
