68. minuhtas nahkehii Ann Solbritt Logje BUL nuppi moala, ja dagahii ahte eai vuoittáhallan, muhto ožžo ovtta čuoggá.
Sotnabeaivvi lei BUL 1. divišuvnna nissonjoavkkus čiekčan Oslos, Lyn vuostá. Čiekčan ii álgán nu bures gussiide, ja ribahedje guokte moala 11. minuhtas.
BUL vuorru ges
Ann Solbritt Logje lei fas ruovttoluotta BUL 1. divišuvnna joavkkus, ja lei mielde čiekčamis álggu rájes. Nuppi vuorus lei boađus 2-1, Lyn vuoittu bealde. 68. minuhtas oaččui Logje spáppa, manai sihke suodjaleddjiid ja moallaolbmá meaddel ovdal go bijai spáppa molli. Boađus šattai 2-2 ja BUL oaččui ovtta čuoggá čiekčamis.
Ruovttučiekčan
Maŋŋel dán čiekčama leat sis njeallje čuoggá, mii dagaha guđat saji. Boahtte čiekčan lea ruovttušiljus, go deaivvadit Kongsvingeriin.
