Dat boahtá ovdan geaidnopolitiijaid raporttas.
Ođđajagemánu ja čakčamánu gaskkas sáhkkohalle 121 biilavuoddji lobihis mobiillageavaheami oktavuođas. Dat lea mealgat unnit go jagi dassái seamma áigodagas. Dalle sáhkkohalle 275 olbmo.
Romssas sáhkkohalle 403 biilavuoddji ođđajagemánu ja čakčamánu gaskkas. Jagi dassái fas 797 olbmo sáhkohalle lobihis mobiilageavaheami geažil vuojedettiin.
Boađus buori ovttasbarggus
Ung i traffiken prošeavtta ja kampánjaovddasvástideaddji Kristine Ohnstad lohká dat leat buorit ođđasat go unnit olbmot sáhkkohallet lobihis mobiilageavaheami dihte.
– Mun háliidan sávvat lihku buot biilavuddjiide buriid loguiguin! Mii leat hui ilus go unnit geavahit mobiilla lobiheamit vuojedettiin. Dat lea duođaštus dasa ahte miellaguoddobargu doaibmá. Mađi unnit biilavuddjiid čalmmit leat šerbmii geahččame, dađi unnit lihkohisvuođat. Lea lohpi leahkit duhtavaš odne, lohká Ohnstad preassadieđu bokte.
Son oaivvilda ahte loguid njiedjan lea boađus johtolatsihkarvuođa aktevrraid ja politiijaid buori ovttasbarggus.
– Dat lea boađus politiijaid ja min buori ovttasbarggus, geat barget johtolatsihkarvuođain juohke beaivvi. Mii jáhkkit ahte kámpanjabargu ja miellaguoddobargu, maiguin mii bargat beaivválaččat, ovttas politiijaid johtolatdárkkistemiiguin, addet rievttis bohtosa, deattuha Ohnstad.
Rámida easkaálgi biilavuddjiid
Diimmá logut čájehit ahte riikadásis leat gaskal 25- ja 34-jahkásaččat geat dávjjimusat sáhkkohallet lobihis mobiilageavaheami geažil. Dan agi olbmotsáhkkohalle 3133 gearddi dahje 28 proseantta. Vuollel 25-jahkásaš biilavuoddjit sáhkkohalle 1 447 gearddi dahje 13 proseantta riikadásis. Oktiibuot riikadásis leat 11 005 sáhkkohallan mannan jagi.
– Nuoramus biilavuoddjit dávjá bealkkahallet, muhto eai leat sii geat dávjjimusat geavahit mobiilla vuojedettiin. Eai ge leat sii geat aiddo ožžon leat vuodjinkoartta geat snappejit dahje scrollejit mobiilla vuojedettiin, vaikko dábálaččat sii atnet mobiilla eanemusat muđui, loahpaha Kristine Ohnstad.
