-Almmuhus-
-Almmuhus-
OĐĐASATLiegga geassi dagáha unnit TV-geahččama

Liegga geassi dagáha unnit TV-geahččama

Journalista

-

-

Norggas eai geahča lihka olu TV, go liegga geassebeaivvit leat. Dan dieđiha ođđa riikaviidosaš iskkadeapmi mii lea čađahuvvon.

Ipsos lea čađahan riikkaviidosaš iskkadeami, ja leat iskan olbmuid TV-geahččan dábiid. Čájehuvvo ahte Norgalaččat eai geahča lihka olu TV go lea báhkka dálki. Dan dieđiha RiksTV preassadieđáhusas.

 

167 minuhta beaivái

Norgalaččat gehččet olu TV. TNS Gallupa dieđuid mielde geahčai juohkehaš gaskamearálaččat 167 minuhtta beaivái diibmá. Geasset gehččet Norggas olu unnit TV go muđui jagis. Iskkadeamis vástidedje 76 proseantta ahte eai geahča olu TV jus lea báhkka dahje fiertu.

Duššo golbma proseantta vástidii ahte gehččet eambbo TV jus šaddá báhkkasit dálki. 18 proseantta vástidedje ahte dálki ii váikkut TV-geahččama.

 

Vástadusat rievddadit

Iskkadeamis jerre «Movt váikkuhit lieggaset beaivvit ja eahkedat du TV-geahččama?». Oktiibuot ledje 1010 olbmo mielde iskkadeamis.

– Ii hirpmáhuhtte ahte olbmot unnidit TV-geahččama jus fierttuda. Dat mii lea miellagiddevaš, lea go vástádusat rievddadit dan mielde makkár luomus leat, lohká RiksTV gulahallanráđđeaddi Tone Mesna.

84 proseantta sis geat barttas áigot leahkit luomus, lohket ahte eai boađe geahččat nu olu TV jus lea fiertu.

14 proseantta sis geat viessovovnnas áigot leahkit luomus lohket ges ahte áigot geahččat eambbo TV.

-Almmuhus-