Okta goit lea sihkar, dat boazologut mat mearriduvvo 2013:s eai leat šat doallevaččat jus fal leat čuvvon njuovvangáibádusaid.
Okta goit lea sihkar, dat boazologut mat mearriduvvo 2013:s eai leat šat doallevaččat jus fal leat čuvvon njuovvangáibádusaid.
Eanandoallodirektoráhtta diehtá ahte boazodoalus lea eahpesihkarvuohta boazologuid, njuovvangáibádusaid ja doarjjaeavttuid dáfus, danne leat almmuhan čilgehusa njuolggadusaid birra.
Boazodoallostivra meannudii guovvamánu 2013:s boazologugeahpedeami 239 siidaossosa hárrái.
Áigemearit geahpedemiide rievddadedje njukčamánu 31.beaivvi 2013 ja njukčamánu 31. beaivvi 2015 gaskkal, dát lei gitta das galle bohcco galge njuvvot.
– Dat mearkkaša ahte geahpedeamit dál galget leat čađahuvvon. Boazodoalostivra čuovvola dál daid siiddaossosiid geat eai leat geahpedan mearriduvvon boazologu mielde, čállá direktoráhtta.
Boazologut eai leat šat doallevaččat
Boazodoallostivrras lei čoahkkin čakčamánu 16. beaivvi, gos mearridedje boazologugeahpedeami ja sáhkuid ovcci siiddaossosa dáfus. Eará sullasaš áššit meannuduvvojit skábmamánu čoahkkimis.
– Boazologugeahpedan mearrádus mii lea dahkkon boazodoallolága §60 mielde, ii leat šat doallevaš maŋŋil go geahpedeapmi lea čađahuvvon. Dat mearkkaša ahte siidaoasus ii leat šat čadnon dan boazolohkui mii mearrádusas čuoččui. Siidda boazolohku dattege ferte ain leat vuolábeale siidda ja orohaga mearriduvvon boazologu, čállá direktoráhtta.
Eanandoallo- ja biebmodepartemeantta lea ráhkdan diehtojuohkinčállosa boazologujuohkima birra, dan sáhttá lohkat dáppe.
Geahpedeamit ja doarjagat
Ovdal go siidaossosis lea vuoigatvuohta oažžut doarjagiid, de ferte čuvvon geahpedangáibádusa. Dát guoská vaikke siidda dahje orohaga boazolohku lea eambbo dahje unnit go mearriduvvon boazolohku.
Mo jus boazolohku lassána?
Jus siidda dahje orohaga boazolohku njukčamánu 31. beaivvi 2016:s lea bajábeale mearriduvvon logu, de siida dahje orohat oažžu vejolašvuođa ieš ráhkadit geahpedanplána.
Jus dás ii šatta ovttaoaivilvuohta de sáhttá boazodoallostivra fas mearridit ođđa boazologu.
Muđuid lea váldonjuolggadus ahte buot siidaossosiin lea vuoigatvuohta oažžut doarjaga nu guhká go siidda boazolohku 31.03.2016, lea unnit go mearriduvvon lohku.
– Jus siidaoasus ii leat čuvvon njuovvangáibádusa, de dat dattege ii oaččo doarjaga, čállá direktoráhtta.
Eanet dáid njuolggadusain lohkat eanandoallodirektoráhta ruovttusiidduin.
