Nils Rune Utsi dahje SlinCraze lea dál áigeguovdil go su birra lea ráhkaduvvon dokumentára. Filbma lea hástalusaid birra mat leat go sámegiel ráppain galgá birget. Geahča filmma trailera áššis.
Nils Rune Utsi dahje SlinCraze lea dál áigeguovdil go su birra lea ráhkaduvvon dokumentára. Filbma lea hástalusaid birra mat leat go sámegiel ráppain galgá birget. Geahča filmma trailera áššis.
– Dieđusge lean máŋgii jurddašan nu, ja mun ráppen maid eaŋgalasgillii ja muhtumin dárogillii, muhto dat ii leat juoga maid dagan beaivválaččat. Lean dieđusge máŋgii jurddašan ahte livčče álki beare heaitit sámegillii ráppet ja geahččalit dárogillii ovdamearkka dihte, lohká Nils Rune Utsi dahje Slincraze.
Son lea sámi rápartista, Mázes eret. Dál čájehuvvo dokumentárafilbma su birra nrk neahtta-tv:s.
Filbma čájeha movt lea leahkit sámi ráppár, ja movt Nils Rune Utsi birge, go ráppe sámegillii.
– Filbma lea mu mátkki birra, daid maŋemuš 4 jagi. Lea mu eallima birra, muhto eanemus fokus musihkkii, lohká Nils Rune.
Hástalusat movttiidit
Filbma galgá čájehit hástalusaid mat sus leat, sámegillii ráppet.
Ávvira journalista jearrá movt dat lea, sámegillii ráppet?
– Dat lea hui somá, in sáhte eambbo dadjat. Lea hástalus, muhto maid hui speantta. Lea hui somá gullat go olbmot liikojit mu musihkkii ja movt mun ráppen, váikko eai ádde sámegiela. Dat lea stuora hástalus birgegoahtit musihkain, muhto dat lea maid mii mu movttiidahttá garrasit bargat.
– Ráppet eará gillii go sámegillii ii leat juoga maid mun áiggošin bargat. Mun áiggun gal doalahit iežan giela, ja ráppet iežan gillii, lohká SlinCraze.
Son lohká ožžon olu rámi filmma ektui, go leat oallugat geat leat dovdan seamma hástalusaid go Nils Rune.
Olbmot dovdet hástalusaid
Olbmot leat lohkan Nils Runii ahte sii orrot maid unna báikkážiin, ja sis leat maid stuora niegut.
– Leat oallugat geat leat dasa čadnon, ja danne leat liikon dan filmma. Leat maid liikon go mii leat nu duođalaččat ja rahppasit muitalan visot.
(Ášši joatká gova vuolábealde)
Govven: Martin Rustad Johansen
Internašunála rápmi
Arctic Superstar filbma lea ožžon olu fuomášumi máilmmis.
Filmmas lei premieara Romssa riikkaidgaskasaš filbmafestiválas, ja lea ožžon olu buriid árvvoštallamiid miehtá máilmmi.
Amerihkálaš Vice magasiidna čálii ahte Arctic Superstar filbma lea okta logi musihkkadokumentárain man ferte oaidnit dán jagi. Cinema Scandinavia filbmamagasiidna ges lea addán filbmii logi čuoggá, logi vejolaš čuoggás.
Nils Rune ii gal girdil dan dihte.
– Lea duššo buorre, dađi guhkkelii olle. Dat dieđusge veahkeha ollu mu musihkain, muhto in mun vuordámušaid lokte juste áibmui danne go lea dokumentára mu birra. Válddán beaivvis beaivái, oaidnit movt manná, lohká son.
Filbma oahpaha
Rešissevra Simen Braathen ja buvttadanfitnodat Indie Film leat čuvvon Nils Rune 2012 rájes.
Stig Andersen ja Indie Film leat buvttadan filmma. Rein Film lea leamaš veahkkebuvttadeaddjin.
– Mii illudit go viimmat beassat čájehit filmma, go njeallje jagi leat bargan dainna. Mun sávan ja jáhkán ahte filbma buktá buori, ja čájeha veahá davvieallima birra, lohká Braathen preassadieđáhusas.
Filbma čájehuvvui NRK1:s, diibmu 22.15 skábmamánu 2. beaivvi. Maŋŋil sáhttá maid geahččat filmma neahttatv:s.
Miessemánus čájehuvvui filbma maid ON-viesus New Yorkas, Álgoálbmogiid bistevaš forumis, Utsi šattai vuosttaš ráppár gii ON-viesus lea ráppen.
Filbma boahtá dálvet čájehuvvot festiválain USAs, Duiskas, Englánddas, Hollánddas ja Ruoššas.
Arctic Superstar filmma trailer:
