Lea go dát duodji?

Garraduojár Johan Mikael Buljo lea máŋgii geahččalan ohcat duodjedoarjaga Sámedikkis. Son oainnát duddjo lávvomuoraid alumiinnas ja muoras, dán rádjai dattege Sámediggi ii leat juolludan sutnje duodjedoaibmadoarjaga. Sii eai oaivvil lávvoruvddiid leat duodjin go alumiinnat maiguin Buljo ráhkada lávvoruvddiid bohtet fabrihkas.

 – Dát lea mu mielas oalle imaš ákkastallan. Mun in dieđe makkár ge duoji mii ii leat ovdánan doložis dássážii. Eai gáktegoarrut ge ieža ráhkat láđđiid, dat maid bohtet fabrihkain. Niibeduojárat eai ge ieža ráhkat ávjjuid, dadjá Buljo.

Hállu viiddidit doaimma

Sámediggi lea árabus juolludan Buljoi duodjeealáhus álggahandoarjaga.

 – Mu mielas lea hui heittot go vuos addet álggahandoarjaga ja de eai šat doarjjo viidáseappo dan doaimma. Mus livččii hui hállu stuoridit mu fitnodaga muhto lea nu eahpesihkar go Sámedigge ii šat oro doarjume nuorra álggaheddjiid.

Son muitala iežas geahččalan guoddalit mearrádusa, muhto Sámedikkis eai leat vel vástidan.

 – Daid lávvomuoraid mat leat muoras ráhkaduvvon, gal leat dohkkehan duodjin. Mun lean várra loge geardde geahččalan bivdit čoahkkima Sámedikkiin dán birra, muhto dasa eai gal oba vástit ge, muitala Buljo.

Bivdán čoahkkima

Čoahkkima lohká bivdán go de livččii álkit gulahallat.

 – Reivviid bokte lea olu váddásit ságastallat, dasalassin ádjána Sámediggi gaskkal jahkebeali ja jagi vástidit reivviide, ja orro hui dábálaš ahte láhppojit dat reivvet maid dohko sádde, dadjá son.

Ii leat ovttaoaivilvuohta

Sámedikkeráđđelahttu Silje Karine Muotkas lea ovddasvástádus earret eará duodjesuorgái. Son ii loga dovdat dán ášši muhto čujuha Sámedikki duodjefágalávdegoddái. Dát lávdegoddi dat árvvoštallá ja dohkkeha duojáriid ja sin buktagiid.

 – Jus dat eai leat dohkkehan de hálddahus čuovvola sin mearrádusa go meannudit doarjjaohcamušaid, dadjá Muotka.

Muotka mieđiha leat váttis digaštallat mii lea duodji ja ii.

 – Eai duodjeorganisašuvnnaid siskkobealde ge leat ovttaoaivilis dákkár áššiin ja mis leat digaštallamat dán birra, čilge son.

 – Leat go du mielas lávvoruovddit duodji?

 – Mun persovdnalaččat in árvvoštala dujiid. Mun čuovvolan dušše fágalávdegotti oaiviliid.

Ávžžuha ohcat eará doarjagiid

Muotka dattege ávžžuha Buljo geahččalit ohcat maiddái investerendoarjaga Sámedikkis.

 – Sávvamis son de lihkostuvašii iežas fitnodagain.

Ávvir ii leat fáhten Sámedikki hálddahusas ovttage ságaide dán áššis. Duodjefágalávdegotti láhttu Anders A. Gaup ii loga háliidit kommenteret áššái, persovdnasuodjaleami geažil.