Ráđđehus oaivvilda ahte buot bargit mánáidgárddiin galget beassat ovdánahttit gelbbolašvuođaset.
– Min mihttu lea sihkarastit ahte buot mánáin lea buorre mánáidgárdefálaldat. Dalle fertejit buohkain geat barget mánáidgárddiin leat dárbbašlaš ja áigeguovdilis gelbbolašvuođat vai sáhttet bures čuovvolit mánáid dili, muitala máhttoministtar Torbjørn Røe Isaksen preassadieđáhusas.
Eanet fágabargit
Ođđa strategiija 2018-2022 áigodagas guoská buot bargiide mánáidgárddis. Mihttu lea gelbbolašvuođa addit vai šaddet eanet mánáidgárdeoahpaheaddjit ja mánáid- ja nuoraidbargit mánáidgárddiin, lassin vel ahte eanet mánáidgárdebargiin lea masterdási oahppu, čilgejuvvo preassadieđáhusas.
Ieža gávdnet heivvolaš čovdosiid
– Mánáidgárddit álget ieža čuovvut ođđa rámmaplána, ja lea dehálaš ahte bargit besset ovdánahttit gelbbolašvuođaset ovttas bargosaji mielbargiiguin. Dat šaddá álkibut gávdnat buriid báikkálaš čovdosiid movt sii sáhttet nannet mánáidgárddi sisdoalu, muitala Røe Isaksen.
Ráđđehus lea eambbo go duppalastán áŋgiruššama gealboloktendoaimmaide mánáidgárddiin 2013 rájes, ja leat lasihan ruhtadeami 165 milliuvnnas 400 milliuvdnii.
