Leat go gaskal 6-18 jagi boaris ja liikot čállit, de beasat dál gilvalit eará nuorra čálliiguin.
Ruoŧa beale Sámedikki Sámi giellaguovddáš ovttas Polarbibblo ja Tjállegoahte lágidit čállingilvu.
Lágideaddjit hástalit mánáid ja nuoraid searvat čállingilvui mas galgá čállit sámegillii ja čállosa fáddá galgá leat ustitvuohta. Gilvui sáhttá searvat govvamuitalusain, divttain, historjjáin, noveallain dahje earálágán čállosiin. Dan dieđihit Ruoŧa Sámedikki neahttasiiddus.
Gilvvus gilvalit mánát ja nuorat golmma ahkeluohkás. Lea jury mii vállje vuoiti juohke luohkás.
Áigemearri sáddet čállosa lea golggotmánu 18. beaivi. Vuoitit almmuhuvvojit sámi giellavahkku, 43. vahkku dán jagi.
Sámedikki siiddus gávnnat lassi dieđuid gilvvu birra.
