Dan rájes go soahti buollái Ukrainas guovvamánus, de leat Norggii ásaiduvvan badjel 28 300 báhtareaddji.
– Čieža mánus leat ásaiduhttán seamma olu báhtareddjiid go maŋimuš vihtta jagi, nu ahte dá gal lea historjjálaš dáhpáhus, lohká Integreren- ja máŋggabealátvuođadirektoráhta direktevra Libe Rieber-Mohn preassadieđáhusas.
Dássážii leat 22 261 báhtareaddji ásaiduvvan Norgga gielddaide, ja lagamus áiggis galget 6 342 báhtareaddji vel ásaiduvvat. Eanaš báhtareaddjit bohtet Ukrainas.
– Go nu oallugat leat ásaiduvvan ja go lea nu oanehis vuordináigi, de dat čájeha man buori barggu gielddat barget. Sis lea stuora dáhttu veahkehit ja ásaiduhttit báhtareddjiid, lohká Rieber-Mohn.
Eanet bohtet
Báhtareaddjit vurdet gaskamearálaččat beannot mánu ovdal go ožžon orrunlobi Norggas, ja nu oanehis vuordináigi ii leamaš goassege ovdal.
– Dat čájeha ahte nagodit dahkat rievdadusaid kriisadilis. Nu go dilli lea dál, de jáhkkit ahte báhtareaddjit lassánit maiddái boahtte jagi, loahpa Rieber-Mohn.
