Ii okta ge dieđe lea go 85 jahkásaš ieš mannan gosage, iežas sorbmen, leamašan lihkohisvuođas, buohccán dahje ráŋggáštusvuloš daguide geavvan.
Ii okta ge dieđe lea go 85 jahkásaš ieš mannan gosage, iežas sorbmen, leamašan lihkohisvuođas, buohccán dahje ráŋggáštusvuloš daguide geavvan.
Kaisa Beddari gii jávkkai Nuorta-Finnmárkkus Báhčaveajis lea šaddan árvádus áššin. Kaisa Beddari doivot mannan murjenmátkái, ja oidnui maŋemusat čakčamánu 3.beaivvi 2013is.
100 olbmo ohce su birrasis go dieđihuvvui lahppon, ja go muohta suttai giđa 2014s de álge fas ohcat su. Leat sihke dronaiguin, fatnasiiguin ja beatnagiiguin ohcan su, čállá NRK Finnmárku.
Kripos veahkeha
– Ođas áššis lea ahte mii leat bivdán Kriposa veahkkin dutkat ášši. Ii leat makkárge dramatihkka dainna, muhto mii háliidit geahčadit olles ášši ođđa čalmmiiguin oaidnin dihte lea go mihkkege eará vel mii sáhtášii dahkkot, dadjá dutkanjođiheaddji Tor Morten Noste Girkonjárgga politiijastašuvnnas NRK Finnmárkui.
– Buot dieđut Kaisa Beddari birra dalle go jávkkai leat dehálaš dieđut midjiide, lohká Noste.
Ii leat šat doaivva
– Kripos ferte beare boahtit veahkkin jus das lea ávki, dadjá Kaisa vilbealli, Johan Beddari NRK Finnmárkui.
Beddaris ii leat šat doaivva gávdnat oambeali, muhto ii áiggo sivahallat politiijaid dan dihte.
– Sii leat bargan nu bures go sáhtte, dadjá Johan Beddari.
