Koronavirus ii čuoza Norgga beale boazodolliid guođoheapmái Ruoŧa bealde ja rádjeguovlluin. Muhto Norgga-Suoma ráji ii beasa rasttildit lobi haga.
Biebmobearráigeahčču dieđiha preassadieđáhusas ahte koronavirus ii váikkut Norgga boazodoalu guođoheapmái Ruoŧa bealde ráji ja Norgga-Ruoŧa rádjeguovlluin. Boazodoallit besset vaikko goas rasttildit ráji eai ge biddjo erremii go máhccet Norgii.
Sii čállet ahte ráddjemat ja dieđut heivehuvvojit ja ođasmahttojit dađistaga dávdda leavvama ja eastadeaddji doaimmaid mielde.
– Vuođđoealáhusat gullet servodaga dárbbašlaš heahtedoaimmaide, go lágidit gálvvu servodahkii, ja boazodoallu gullá maid dieđusge vuođđoealáhusaide.
Bivdet doalahit guokte mehtera gaskka
Fylkkamánnit leat eanandoallo- ja biebmoministara gohččuma mielde kárten Norgga boazodolliid geain dál leat bohccot Ruoŧa bealde ja gos bohccot leat, ja lohket gávnnahan ahte máŋgga orohaga bohccot leat Ruoŧa bealde dahje rádjeguovlluin.
– Boazodoallit galget nu olu go lea vejolaš garvit eará olbmuid lahka mannamis. Dás oaivvilduvvo doalahit guokte mehtera gaskka, ii ge leat lahka guhkit go 15 minuhta, ii ge galgga guoskat nubbái. Muđui leat njuolggadusat isolerema birra sidjiide geain leat duođaštuvvon dahje váruhuvvo dávda, mat gusket buohkaide.
Máŋga roasu oktanis
Sii muittuhit ahte lea hui dehálaš ahte boazodoallit barget buot maid sáhttet eastadit njoammuma.
– Dát njoammudaneastadeapmi boahtá vel lassin guohtunrossui mii lea ollu boazodoalloguovlluin Norggas. Lea hui dehálaš ahte boazodoallit bissot dearvvašin, vai buoremus lági mielde beassat daid roasuid čađa main mii leat dál, dadjá stáhtaráđđi Olaug Bollestad.
Ollu masttalmasat
Ollu guovlluin leat Norgga ja ruoŧa boazodoallit masttadan, ja maiddái siiddat leat masttadan. Rátkimiid galgá muddet eanemus lági mielde ja daid galgá čielggadit fylkkamánniin.
Barttaid birra čállet eiseválddit ahte guođoheapmái ja eará boazobargguide sáhttet boazodoallit atnit barttaid mat leat guođohanbarttat ja mat leat orohagaid doaibmanjuolggadusain.
Barttaid galget dušše boazodoallit geat barget bohccuiguin atnit.
Supmii ii oaččo mannat
Suoma-Norgga rádji lea giddejuvvon rádjerasttildeaddji boazodollui. Jus bohccot rasttildit ráji, galgá rasttildeapmi meannuduvvot Norgga-Suoma boazoáidekonvenšuvnnas.
Biebmobearráigeahčču ii loga koronavirusa leat áittan elliiddearvvašvuhtii Norggas, eai ge Norgga eallit sáhte njoammudit virusa olbmuide. Sii čujuhit muđui Biebmobearráigeahču neahttasiidui gos leat eambbo dieđut.
