-Almmuhus-
-Almmuhus-
OĐĐASAT Konsultašuvdna šaddá láhkan

Konsultašuvdna šaddá láhkan

-

-

Sámediggi ja ráđđehus leat soahpan konsultašuvdnaláhkanjuolggadusaid sámelága ođđa kapihttalis.

– Čielga njuolggadusat konsultašuvnnaide sáhttet mielddisbuktit beaktilit proseassaid ja eanet diehttevašvuođa beliide. Mun lean ilus go mii dál leat ovttaoaivilis nannet konsultašuvdnaortnega lága bokte sámelága sierra kapihttalis, dadjá gielda- ja ođasmahttinministtar Monica Mæland preassadieđáhusastis

Sámediggi, Norgga Boazosápmelaččaid Riikkasearvi ja ráđđehus leat boahtán ovttaide ovddidit láhkaevttohusa konsultašuvdnanjuolggadusaid birra.

 

Buorit vásáhusat

Gielda- ja ođasmahttindepartemeanta lea sádden ráđđehusa láhkanjuolggadusevttohusa Sámedikki dievasčoahkkima meannudeapmái mii lea geassemánus.

Jus Sámedikki dievasčoahkkin doarju evttohusa, de áigu ráđđehus ovddidit proposišuvnna Stuoradiggái loahpageahčen geassemánu.

 – Mis leat buorit vásáhusat dálá konsultašuvdnaortnegiin. Konsultašuvdnaortnet lea okta dain deaŧaleamos reaidduin sámepolitihkas. Seammás lea muhtumin eahpečielggas man birra mii galgat konsulteret, ja mainna lágiin konsultašuvnnat galget čađahuvvot. Dainna áigu ráđđehus dahkat juoidá, dadjá Mæland.

 

Sihkkarastá ovttamielalašvuođa mearrádusaid

– Mii leat ožžon stuorát čielggasvuođa das movt okta deaháleamos gaskaomiin sámepolitihkas galgá geavahuvvot. Konsultašuvdnanjuolggadus sihkkarastá ahte Sámediggi ja eará njuolga guoskkahuvvon sámi beroštumit servet juksan dihtii ovttamielalašvuođa mearrádusaid dahkamiin mat midjiide leat deaŧalaččat. Njuolggadusat leat deaŧalaččat vai sihke Sámediggi ja eará sámi beroštumit sáhttet leat mielde hábmemin ja mearrideamen boahtteáiggi eavttuid sámi giela, kultuvrra, ealáhusaid ja servodateallima várás, dadjá sámediggepresideanta Aili Keskitalo preassadieđáhusastis.

 

Vuordá buriid proseassaid

Gielddaid ja fylkkagielddaid konsultašuvdnageatnegasvuohta fakkastuvvo lágas nu ahte addojuvvo munni iešguđege vugiin gozihit konsultašuvdnageatnegasvuođa, dan vuođul go leat stuorra erohusat gielddaid gaskka sturrodaga, gelbbolašvuođa ja searvanhámi ektui go lea sáhka sámi beroštumiin.

 – Gielddaid ja fylkkagielddaid konsultašuvdnageatnegasvuođa láhkačatnamiin nannejuvvo maiddái vuođđu ovttas bargat sámi beroštumiid, gielddaid ja ja fylkkagielddaid gaskka. Lágas biddjojuvvo nu ahte dán konsultašuvdnageatnegasvuođa sáhttá gozihit iešguđege láhkai ja danne vuorddán mun mielas buriid proseassaid dan birra ávkin báikkálaš, regionála ja sámi servodatovddideapmái, dadjá Keskitalo.

 

Ulbmil konsultašuvdnaortnegiin

Konsultašuvdnaortnet galgá sihkkarastit ahte Sámediggi ja sámit besset oassálastit mearridanproseassain áššiin main sáhttá leat mearkkašupmi sidjiide. Konsultašuvnnat galget čađahuvvot dainna ulbmiliin ahte boahtit ovttaide evttohuvvon doaimmain.

Ráđđehus evttoha dál bidjat bajitnjuolggadusaid konsultašuvnnaid birra sierra kapihttalis sámelágas.

Dás lea vuosttažettiin sáhka fievrredit viidáset njuolggadusaid otná prosedyrain «Stáhta eiseválddiid ja Sámedikki gaskasaš konsultašuvnnaid prosedyrat».

 

-Almmuhus-