Odne almmuhuvvui Ruoŧa Oscar-jury ahte leat válljen Amanda Kernella filmma «Charter» leat Ruoŧa Oscar-bálkkašumi evttohussan suorggis «Buoremus internationála filbma».
Amanda Kernell ovddasta dál Ruoŧa Oscar-gilvvus. Preassadieđáhusas čilge Kernell:
– Lea imaš álgu filbmii go lei vuosttaščájálmas justa go korona leavvagođii máilmmis. Muhto dál lea dovdu buorre go filbma johtá máilmmis ja olbmot gehččet dan ja váikkuhuvvojit. Lea erenomaš dovdu beassat ovddastit Ruoŧa Oscar-gilvvus, čilge Amanda Kernell.
Jury válljen
Ruoŧa Oscar-jury čilge ahte sii leat válljen Kernella filmma go lea persovnnalaš ja guoskkaheaddji filbma.
– Dat lea bearašdrámá ja okta dán jagáš stuorimus filbmavásáhusain. Dat lea dušše nubbi guhkesfilbma man Amanda Kernell lea ráhkadan ja dat lea buorre mearka boahtteáigái. Mis lea deaivilis bagadalli gii lea ovdánan ovtta dain beroštahttimus europealaš filbmadáiddáriin, dadjá Ruoŧa filbmainstituhta hoavda ja Oscarlávdegotti váldohoavda Steffen Andersen-Møller preassadieđáhusas.
«Charter» filmmas lei vuosttaščájálmas Ruoŧas njukčamánu 13, beaivvi 2020. Sámi nieida Tintin Poggats Sarri neaktá filmmas ja nektet maid eará sápmelaččat filmmas, nu go Sofia Jannok, Ayla Gáren Audhild P. Nutti ja Ella-Marge P. Nutti.
