Fargga álget dán jagáš ráidočiekčamat. Kárášjoga ja Guovdageainnu lunttat deaivvadit fas, ja jotket doarrut «Duoddara gonagasat» nama badjel.
Dán mánu loahpas álget Finnmárkku spábbačiekčama ráidočiekčamat.
Deaivvadit fas
Diimmá ráidočiekčamis čikče Guovdageainnu ja Kárášjoga lunttat guovtte geardde vuostálaga, ja goappašat joavkkut sihke vuite ja vuoittáhalle.
Dán jagi lea fas garra gilvu joavkkuid gaskka, go fas deaivvadit.
Vuosttaš čiekčan vuostálaga lea miessemánu 16. beaivvi Niitoguolbanis.
Vuosttaš čiekčan
Vuosttaš čiekčan dán jagi lea lávvordaga, cuoŋománu 22. beaivvi.
De deaivvada Guovdageaidnu Fállejogain Finnmarkshallenis Álttás, Honnesváhki Indrefjordain Honnesvági spábbačiekčanšiljus, Porsáŋgu Nordlysain Leavnnja spábbačiekčanšiljus, Girkonjárga Bossegohpiin Girkonjárgga spábbačiekčanšiljus ja Guovžajávri Norildain Bjørneparken spábbačiekčanšiljus.
