Okta oahpaheaddji Sámi joatkkaskuvllas Kárášjogas lea ožžon errenáiggi go lea leamaš seamma girdis go muhtin geas čájehuvvui korona-virus.
Sotnabeaieahkeda ožžo Sámi joatkkaskuvlla oahppit Kárášjogas SMS dieđu mas muitaluvvo ahte okta skuvlla bargiin lea errenáiggis vahkkui.
Skuvlla rektor Synnøve Solbakken-Härkönen duođašta ahte bargi lea biddjon errenáigái.
– Mis oaččui okta bargi ikte dieđu ahte son galgá vahkku leat errenáiggis. Dat lea dakkár várrugas prinsihppa go son lea leamaš seamma girdis go muhtin geas lea korona-virus, dadjá rektor.
Bargan vahkku
Bargi, gii lea errenáiggis, lea oahpaheaddji geas eai leat nu ollu oahpahusdiimmut. Son lea vahkku bargan maŋŋel go bođii fas davás girdiin, ja Solbakken-Härkönen muitala ahte bargi ii leat leamaš buozas eai ge leat leamaš makkár ge dávdamearkkat.
– Mii čuovvut Álbmotdearvvašvuođainstituhta (FHI) ja doaktáriid rávvagiid ja njuolggadusaid. Dál iđđesárrat lea mis leamaš diehtojuohkinčoahkkin bargiiguin ja mis lea skuvllas dábálaš oahpahus, muitala rektor.
Eai gidde skuvlla
Vaikko oahpaheaddji lea leamaš barggus vahkku, de eai gidde joatkkaskuvlla.
– Mii eat sáhte giddet skuvlla. Mii leat ožžon dieđu ahte dasa ii leat ágga. Mii čuovvut FHI rávvagiid, dadjá rektor ja joatká:
– Mii eat bala go virus han goitge boahtá deike oktii. Mii fertet čuovvut rávvagiid máid ain oažžut.