-Almmuhus-
OĐĐASAT Kárášjoga Dáiddaskuvla oažžu doarjaga

Kárášjoga Dáiddaskuvla oažžu doarjaga

-

-

Kárášjoga Dáiddaskuvla lea leamaš váttis ruhtadilis. Muhto gaskavahku oaččui skuvla illusága.

Finnmárkku Fylkkadiggi  meannudii gaskavahku earret eará Kárášjoga Dáiddaskuvlla ášši. Iežas Facebook-siiddu  bokte Kárášjoga Dáiddaskuvla dieđiha ahte Finnmárkku Fylkkadiggi lea positiivvalaččat meannudan Kárášjoga Dáiddaskuvlla ohcama. Skuvla lei ohcan 250 000 ruvdnosaš doarjaga.

– Ollu giitu, ráhkis ustibat buot doarjagiid ovddas. Buorit sávaldagat eai goassige leat duššás. Dan háve mii leimmet máŋgasat, čállá Kárášjoga Dáiddaskuvlla vuođđudusa stivrajođiheaddji Ingunn Utsi iežas Facebook-profiilla bokte.

Finnmárkku Fylkkadiggi  meannudii gaskavahku Kárášjoga Dáiddaskuvlla ohcama ekonomalaš plána ášši oktavuođas.

 

Kárášjoga gielda ja Norgga Sámediggi ledje jo ovdal dorjon Dáiddaskuvlla ruđalaččat. Goabbáge juolludii 250 000 ruvnno.

Mii giitit Finnmárkku Fylkadikki, Norgga Sámedikki ja Kárášjoga gieldda go juolludedje doarjaga Kárášjoga Dáiddaskuvlii. Dát mearkkaša ahte skuvla ii heaittihuvvo, čállá Kárášjoga Dáiddaskuvla preassadieđáhusastis.

 

Gádjunbargu ii noga

Boahtte vahkus lávvordaga, juovlamánu 16. beaivvi, Kárášjoga Dáiddaskuvla ovttas musihkkariigun lágida doarjjakonseartta.

Akšuvdna «Leage mielde gádjumis Kárášjoga Dáiddaskuvlla» joatkašuvvá. Doarjjakonseartta lágidit Servodatviesus ja dienas konsearttas manná Dáiddaskuvlii, muitala preassadieđáhusastis Kárášjoga Dáiddaskuvla.

Musihkkárat Magnus Vuolab ja Terje Tretnes galgaba ordnet musihkkaoasi. Dáiddaskuvlla studeanttat galget ordnet reasta oasi. Lágideapmi oaivvilduvvo buot buolvvaide.

– Dainna lágiin Dáiddaskuvlla studeanttat ja dáiddárat ožžot buoret skuvlaekonomiijadili. Skuvla nagoda buorebut máidnut iežas ja oažžut eambbo studeanttaid skuvlajahkái 2016-2017, čállá preassadieđáhusastis Kárášjoga Dáiddaskuvla.

Skuvla áigu maiddái buoridit doarjagiiguin reaidduid.

 

 

- Advertisement -
-Almmuhus-