Moadde beaivvi ovdal dan stuora gilijuovlabeavddi skuviha busse gillái ja amas olbmot livket rámbuvrra birra. Dát lea muhtumiid miela mielde, muhto earát fas barget bátnegaskkiid baldit amas olbmuid mannat. Gilis lea «ráfehis» dilli. Rámbuvra galgá stuoriduvvot, ja rámbureaiggát ii leat rásken bálkkáhit báikkálaš snihkkáriid, muhto váldán olgoriikasnihkkariid.
Dát fearánat ránnjážiid birra leat dáhpáhuvvan ovtta gilážis, na soaitá vaikke Jergolis, Mázes, Sirpmás dahje Gáivuonas, gii dan diehtá. Ránnjážiin leat goit, nu go ránnjážiin lávejit ge, olu somás ja muhtun eai nu somás dáhpáhusat. Ráhkesvuohta, birgejupmi ja balahahkesvuohta dagahit olu bárttiid giliolbmuide.
Dán jagi beassabehtet gullat nuppádassii juovlakaleandara mii almmuhuvvui juovlamánu 2018.
