Ruohttabeaivvi čuvggodettiin juo oidno Kirstte dálu olggobealde soames livkime. Iige hal leat gal Firkkal-reaŋga ge okto go iđđesárrat vuojista rámbuvrra lusa. Gáren smujjada ovdabeaŋkkas ja lea oalle gába go bussiiguin fas vázzila biilii. Mii bat dál go sus ge lea fas iežas vuoddji.
Dát fearánat ránnjážiid birra leat dáhpáhuvvan ovtta gilážis, na soaitá vaikke Jergolis, Mázes, Sirpmás dahje Gáivuonas, gii dan diehtá. Ránnjážiin leat goit, nu go ránnjážiin lávejit ge, olu somás ja muhtun eai nu somás dáhpáhusat. Ráhkesvuohta, birgejupmi ja balahahkesvuohta dagahit olu bárttiid giliolbmuide.
Dán jagi beassabehtet gullat nuppádassii juovlakaleandara mii almmuhuvvui juovlamánu 2018.
