Anne Kirste lea mahkáš siesás luhtte idjadeame, vaikko duohtavuođas lea Ántte ja eará nuoraid mielde mannan skutertuvrii. Nugo juo nuorat leat ge, de eai stađa nu guhká hyhtas, muhto dollejit fas gillái vuojašit. Maiddái earát leat stađuheamit dan ija ja leat oallugat jođus márkanis dan ija.
Dát fearánat ránnjážiid birra leat dáhpáhuvvan ovtta gilážis, na soaitá vaikke Jergolis, Mázes, Sirpmás dahje Gáivuonas, gii dan diehtá. Ránnjážiin leat goit, nu go ránnjážiin lávejit ge, olu somás ja muhtun eai nu somás dáhpáhusat. Ráhkesvuohta, birgejupmi ja balahahkesvuohta dagahit olu bárttiid giliolbmuide.
Dán jagi beassabehtet gullat nuppádassii juovlakaleandara mii almmuhuvvui juovlamánu 2018.
