Mátta-Sámi dearvvašvuođafierpmádat ja sámi dearvvašvuođajoavku ožžot 335 000 ruvnnu 2022 bargui.
Mátta-Sámi dearvvašvuođafierpmádaga váldoulbmil lea ovddidit seammaárvosaš dearvvašvuođabálvalusaid sámi álbmogii diehtojuohkima, prošeaktabargguid, dutkama ja klinihkalaš barggu bokte.
– Mii Sámediggeráđis leat movttegat go vuot beassat juolludit ruđa prošektii. Lea alla ja dehálaš gelbbolašvuohta dan joavkkus, ja danin lea dehálaš ahte Sámediggi doarju dan, dadjá sámediggeráđđi Runar Myrnes Balto (NSR) preassadieđáhusas.
Sámi dearvvašvuođajoavkkus leat dearvvašvuođabargit geain lea olu bargovásáhus dearvvašvuođalágádusas, ja geain lea gelbbolašvuohta sámi dearvvašvuođagažaldagain. Sis leat vuoruhusat mat earret eará nannejit psyhkalaš dearvvašvuođa sámi mánáid ja nuoraid gaskkas. Maiddái prošeavttat mat veahkehit eastadit ja unnidit iešsorbmema ja iešsoardingeahččalemiid, ja prošeavttat mat ovddidit buori dearvvašvuođa boazodoalus.
