Guovdageainnu suohkan lea juolludan 125 000 ruvnnu Davvi Division AS:i mas lea ulbmil lágidit guokte juovlakonseartta Guovdageainnus.
Davvi Division AS lea ohcan 200 000 ruvnnu doarjagii lágidit juovlakonseartta ovttas Lounge Sápmi fierpmádagain. Prošeakta galgá lágidit guokte juovlakonseartta Guovdageainnu girkus gos galget ovdanbuktojuvvot juovlalávlagat davvi-, julev- ja máttasámegillii.
Ulbmil lea addit sámi álbmogii eambbo positiiva juovlavásáhusaid sámegillii, ja lágidit konsearttaid mat sáhttet buohtastahttojuvvot ámmátlaš konseartafálaldagain ja juovlakonsearta gierdomátkkiin maid muđui oaidná miehtá riikka.
Guovdageainnu suohkana ovdagoddi juolludii maŋemus čoahkkimis 125 000 ruvnnu prošektii.
Guovdageainnu suohkan čállá ahte juovlakonsearttas lea vejolašvuohta leat árvvolaš kulturdoallu suohkanii. Doalut go dát ráhkadit positiiva miellalági juovlaáigodagas ja addá báikkálaš musihkkáriidda ja artisttaide báikki gos besset čájehit iežaset taleantta.
