Juoiggadit Ipmila

Máhtte Sikku Valio juoiggai dán luođi Fjällkyrkan friddjagirkus Gironis miessemánu 9.beaivvi. Su fárus girku ovddageahčen ledje Arild Måsö, Arne Valio, Tuulia Kaurala ja Mary Elizabeth Vorrath čuojaheame ja juoigame.

Video lea vižžon youtube neahttabáikkis, ja dan lea  Tina Björnström filbmen. 

Sikku Valio dajahallá luođis sihke halleluja, bassivuoiŋŋa ja sivdnideaddji, ja luođi lea gohčodan Reggaejoik. Dát luohti Ipmilii lea dahkkon juo 2003 ja lea dan rájes gávdnon Youtubes, seamma dajahusaigin.

 – Juo, dien luođi lean juoigan Ipmilii juo 12 jagi áigi. Lea dakkár máidnun Ipmilii mii lea vuođđun, dadjá sohpparlaš Sikku Valio gii moadde jagi áigi lea searvan hellodatustibiid searvegoddái Guovdageainnus, gos dál orru.

Bohtet rohkadaladettiin

Máhtte Sikku Valio lea leamaš guovddáš olmmoš Mollet joavkkus, muhto lea dušše Rolffa joavku mii lea juoigan dan luođi skerrui. Son lea máŋgii dan rájes go dagai Reggaejoik luođi, juoigan dan girkuin feara gos. Sus leat maid eará vuoiŋŋalaš luođit maid láve juoigat girkus ja gosa ain bovdejuvvo.

 – Lean vuoiŋŋalaš luđiid ožžon Ipmilis. Luođit han sáhttet dego ieža boahtit, hui álkidit. Muhtomin dat bohtet go lean rohkadallame dahje máidnume Ipmila. Fáhkka bohtet dajahusat dahje luohtemohkit, muitala son.

Ráhkada ođđa máidnuma

Sikku Valio ipmirda gal bures sin geat eai ane vuogasin go girkus juiget, ii ge eisege áiggo viggat girkuide luđiin.

 – Dan oainnu gal ferte vuhtii váldit, ja mun láven álo go bovdejuvvon juoigat girkui, ieš árvvoštallat movt váikkuhan dasa gii guldala. In hálit duolbmut ovttage juolgesuorpmaid. Jurddašan ahte lea Ipmila árbmu go lean bestojuvvon, ja biibbalis čuožžu ahte galgá ráhkadit ođđa máidnuma. Dat lea addán munnje movtta joatkit. Ii dárbbaš dušše lávlut sálmmaid, luohti maid lea fiinnis, dadjá son.

Feastabáikkiin maid

Su mielas ii leat luohti suddu, ja son luohttá ahte osku čájeha geainnu movt meannudit dán áššis. Ii ge son oainne dan nu stuora váttisvuohtan ahte Reggaejoik čuojahuvvo juhkanbáikkiin.

 – Juo, lean muhtumin čuojahan dakkár feastabáikkis ieš. Dat lea hui suohtas. Go mun dan dagan, de sávan ahte lea goitge juogalágán buressivdnádus, ahte soaittán olahit daidda olbmuide geat doppe leat.

Son lohká maid olu smiehttan dan birra go Rolffa ii leat váldán vuoiŋŋalaš dajahusaid.

 – Dat lea vehá nuo ja ná. Sii jerre ja vuosttaš jurdda lei ahte lea hui somá, go jurddašin ahte lea rievtti mielde máidnun. Jurddašin dat lea buorre.

 – Maid dál jurddašat dan birra?

 – Na, in mun dieđe. Vuolggasadji das lea goit ahte lea vuoiŋŋalaš. Go Ipmila máidnun ii čuovo viidáseappot, de dat massá dien dási. Das ii leat šat seamma doaibma. Muhto sii geat leat gullan originála luođi, soitet dan muitit go gullet Rolffa. Ja stuora oassi das lea illu ja mokta, juste maid Ipmil sáhttá addit. Ipmil sáhttá máŋgga ládje olbmuide olihit, dadjá Mattias Sikku Valio.