Davvi-Norggas rahčet badjel 25 000 olbmo lieđđegavjjaid dihte mii dagaha allergiija.
Davvi-Norggas rahčet badjel 25 000 olbmo lieđđegavjjaid dihte mii dagaha allergiija.
Badjel 25 000 olbmo leat buohccindieđihuvvon go lea ollu lieđđegavja áimmus.
Allergiguiden lea čađahan jearahallama ja 16 proseantta jerrojuvvon olbmuin dadjet ahte sii leat buohccindieđihuvvon sullii logi beaivvi jagis lieđđegavjjaid dihte.
Oktiibuot šaddet 40 500 manahuvvon bargobeaivvi go lea lieđđegavjaáigi. Áššedovdit ávžžuhit olbmuid fitnat doaktára luhtte ja gávdnat rievttes dálkkodeami, vai dálkasat buoremusat doibmet ja jávkan barggus ii leat nu stuoris.
Duođalaččat váldit dávdamearkkaid
Olmmošlohku geat bártidit allergiijain leat lassánan moatti jagis, ja beallje-njunne-čottaossodaga jođiheaddji ja professor Sverre Steinsvåg muitala golbma siva manne lieđđegavjaallergiija lassána: eallinvuohki, unnán D-vitamiidna ja dálkkádatrievdan.
– Ferte duođalaččat váldit dávdamearkkaid, ii ge doaivut ahte ieš dušše sáhttá dálkkodit allergiija. Lea váttis eastadit lieđđegavjaallergiija, muhto buori bagadeami ja rievttes dálkkodeami vuođul sáhttá unnidit dávdamearkkaid ja buoridit eallinvásáhusa ollu, lohka Steinsvåg.
Dáppe sáhttá iskat man ollu lieđđegavja lea áimmus doppe gos don leat.
Stuora olggosgollu
Lieđđegavjaallergiija lea stuora gollun bargoaddiide ja máksá máŋga miljárdda juohke jagi.
Sintef lea iskan NHO ovddas ja gávnnahan ahte go bargi jávká barggus, de máksá dat 13 000 ruvnno vahkku ovddas go massá buvttadeami ja go golut lassánit.
