Guovdageainnus ja Álttás leat mannan ijá leamaš johtolatlihkohisvuođat ja Nuorta-Finnmárkkus dieđihuvvojit festiválariejat.
Diibmu 04.30 dieđihii Finnmárkku politiijaguovlu Twitteris johtolatlihkohisvuođa birra Guovdageainnus. Das lei okta biila geavvan luottas eret. Biillas lei dušše okta dievdu. Politiijaid operašuvdnajođiheaddji, Lars Rune Hagen, muitala báikkis fitne sihke buollinčáskadeaddjit, ambulánsa ja politiija.
– Midjiide ii leat oahpis leago dievdu garrasit roasmmehuvvan, muhto biila lei billašuvvan. Mii eat jáhke ahte lei gárrendilis vuodjime, dadjá Hagen.
Gárrendilis vuji
Nubbi ášši mii dieđihuvvui Twitteris sotnabeaivve iđida, lei fas dievddu birra guhte vujii gárrendilis. Dát diehtu bođii diibmu 05.15. Politiijat bissehedje persovdnabiilla mii mohkastii olu. Čájehuvvui ahte dievdu lei gárrendilis. Operašuvdnajođiheaddji, Lars Rune Hagen, muitala politiijat dolvo su doavttirváktii gos váldui varraiskkus dievddus.
– Dan varraiskosa leat sádden analyseremii ja dievdu váido, dadjá Hagen.
Lihkohisvuohta Álttás
Iđđesija sullii diibmu 4, dieđihuvvui Twitteris johtolatlihkohisvuođas Álttás. Biila lei geavvan luottas eret ja geavai biilla robi ala. Biillas ledje golbma olbmo, muhto eai roasmmehuvvan. Sii galge fitnat doavttirvávttas iskkahuvvot. Báikkis fitne sihke politiijat ja buollinčáskadeaddjit.
Festiválas rikkeren
Nuorta-Finnmárkkus leat dán vahkkoloahpa lágiduvvon festiválat. Vuonnabađas lei Eddemannak bearjadaga ja Hessengas lea Grenseløsfestivála guovtti beaivvi badjel lágiduvvon, bearjadagas lávvardahkii.
Ihkku, gaskkal diibmu 1 ja 2 leaba guokte nuorra dievddu bidjon eret Grenseløsfestiválabáikkis go leigga rikkeren ja menddo olu juhkan. Okta dáin dievdduin bođii ruovttoluotta festiválabáikái diimmu maŋŋel go lei olggos bidjon, ja váidui politiijain go rihkkui gohččuma.
