Stáhta geaidnodoaimmahat dieđiha eastadan dihtii lihkohisvuođaid, de gildet johtolaga Deanu šalddi vuolde belohahkii dan botta go lea loktemin ođđa šalddi osiid sadjái.
Stáhta geaidnodoaimmahat dieđiha preassadieđáhusas geassemánu 4. beaivvi ahte dál gildet sii belohahkii johtolaga Deanu šalddi vuolde go sii leat dál huksemin ođđa Deanu šalddi.
– Šaldebarggu geažil fertet mii ráddjet johtolaga Deanus. Mii sávvat dát ii heađuš menddo olu luossabivddu ja sávvat ahte olbmot áddejit ahte mii fertet joatkit šaldehuksemiin, lohká Stáhta geaidnodoaimmahaga prošeaktajođiheaddji Kaare Ramberg.
Belohahkii johtolatgielddus
Ođđa Deanu šaldi ollá dál sullii 90 mehtera bajábeallái Deanu.
Juohke goalmmát dahje njealját vahku loktejit ođđa geaidnooasi sadjái nu ahte šaldi guhkku sullii 15 mehteriin juohke háve.
– Juohke geaidnooassi deaddá birrasii 105 tonna ja mis lea bargu jođus oppa áiggi. Dáhpedorpmis sáhttet gahččat reaiddut Detnui. Danin gieldit johtolaga Deanus dákko bokte belohahkii, čilge Ramberg.
Guovlu gos ii leat lohpi johtit, lea merkejuvvon guđain oránša balloŋŋain dahje doabbaliin vulobeale ođđa šalddi ja merkejuvvon njuolain gokko sáhttá johtit šalddi vuolde.
Rievdá dađistaga
Guovlu gokko ii leat lohpi johtit, rievdá dađistaga go šaldehuksen joatká, ja olbmot geat dás johtet, fertejit leat liigeáicilat.
– Bargosihkarvuohta lea midjiide hirbmat dehálaš dan botta go mii hukset šalddi rástá Deanu, eat ge mii hálit vahágahttit olbmuid dahje dávviriid. Mii doaivut ahte buohkat geat johtet Deanu alde, maid jurddašit seamma láhkai ja ahte sii doahtalit johtolatgildosa, lohká Ramberg.
